Өнгөрсөн жил мазаалай баавгайг хамгаалахад манай улс нийтдээ 688,140.00 төгрөг зарцуулсан байна. БОНХЯ-ны ажлын тайлангаас үзвэл, төлөвлөсөн ажлынхаа 88 хувийг бүрэн хэрэгжүүлсэн бөгөөд он дамжин хийх олон ажил бий гэнэ. Тухайлбал, өнгөрсөн онд мазаалай баавгайнд зориулж дөрвөн уст цэг шинээр байгуулж, гадаргын усны хэмжээг нэмэгдүүлэх зорилгоор Шар хулс, Хөшөөтөд хоёр булаг шанд сэргээн тохижуулж, хөв байгуулсан аж. Түүнчлэн Эхийн голд 0.5 га, Баянтооройд 0.7 га газарт мазаалайн уургийн агууламж өндөртэй шинэ нэмэлт тэжээл болох эрдэнэшиш, буурцагт ургамлыг тарьсан учраас идэш тэжээлийн хувьд санаа зоволтгүй гэлээ.