Энэ оны эхний 10 сарын байдлаар Гаалийн ерөнхий газрын харьяа 18 газар, хороодоос явуулсан хяналт шалгалтын дүнд  захиргааны 2371 зөрчил, эрүүгийн гэмт хэргийн шинжтэй 100 зөрчил илрүүлэн, хянан шийдвэрлэжээ.

Үүнээс Улаанбаатар хот дахь Гаалийн газарт захиргааны 836 хэрэг, эрүүгийн шинжтэй зөрчил 26, Замын-Үүд дэх Гаалийн газарт захиргааны 634 хэрэг, эрүүгийн шинжтэй 40 зөрчил илрүүлжээ. Эдгээр нь хориглосон хязгаарласан барааг улсын хилээр нэвтрүүлэхийг завдах, гаалийн татвар төлөхөөс зайлсхийх, мэдүүлэх журам зөрчих гэх нийтлэг зөрчил  илэрсэн бол гэмт хэргийн шинжтэй үйлдлүүдийн ихэнх нь түүх соёлын дурсгалт зүйлсийг улсын хилээр хууль бусаар нэвтрүүлэхийг завдах, хар тамхи мансууруулах бодис, эм эмийн зүйлс, химийн бодис нэвтрүүлэхийг завдах, их хэмжээний татвар төлөхөөс санаатайгаар зайлсхийх гэх мэт ноцтой хэргүүд эзэлжээ. Түүнчлэн тус байгууллагаас 41 сая 600 мянган төгрөгийн бараа хураан авч, зөрчил гаргасан иргэдэд 36 сая 820 мянган төгрөгийн торгууль ногдуулж, 251 сая 500 мянган төгрөгийн татварыг нөхөн төлүүлжээ. Тиймээс гаалийн байгууллагаар үйлчлүүлэгчид сайн дураараа хууль тогтоомжийг мөрдөн, хууль сахилтаа дээшлүүлэхийг Гаалийн байгууллагаас анхаарууллаа.