“Хямд үнэ, чанартай сон­голт” гэх уриатайгаар зөв­хөн хэрэглэгч танд л соёлч боловсон үйлчилнэ хэ­мээн рекламддаг “Миний дэл­гүүр”-ийнхэнд эргэлзэх боллоо. Хэр баргын үйлчилгээг голдоггүй миний хувьд хүнтэй аятайхан харилцаад бараагаа сайн тайлбарлаад өгвөл боллоо гэж боддог байв. Гэвч харилцааны соёлгүйн дээр хулхи бараа заран манийгаа “чадах” гэдэг эл дэлгүүрийн увайгүй үйлдэл хэрээс хэтэрч буй учраас тэрлэхээс аргагүйд хүрсэн минь энэ.

Байгуулагдсан цагаасаа л хэрэглэгчдээ голд нь ортол гомдоох тус дэлгүүрийнхэн худалдаа, үйлчилгээний га­зар гэхээсээ илүүтэй тэсвэр тэв­чээрийн хатуужлыг шалгадаг бэрд ч гэмээр. Тиймдээ ч үйлчлүүлэгчээ дугаарлан ха­рилц­даг, өттэй, хорхойтой, ялзарсан  жимс, гурил, будаа, хөгцөрсөн хиам зарсан гээд л тус дэлгүүрийнхний хэрэг­лэг­чээ гомдоосон гомдол тас­рахгүй. Хамгийн сүүлд гэхэд л, бяцхан хүүгийн аминд хүрэх шахсан ялзарсан жимсний хэрэг. Өсч яваа хүүхдийн эрүүл мэндээр тоглочихоод тоосон шинжгүй “Бид эмнэлэгт нь очиж нэг уулзсан. Эмчилгээнийх нь зардлыг даана л гэсэн шүү дээ” хэмээн тоомжиргүй хариулах тэр менежер залуу үр хүүхэдгүй, элгэн садангүй, чулуунаас төрсөн хүн гэж үү. Эсвэл хэргийн баримт болох ялзарсан алимаа устган айдгаа авдартаа хийчихсэн юм чинь хэмээн хөлөө хүрэх газарт заргалдаарай хэмээн алим авч өгснөөрөө буруутан болсон ахыг нь дээрэлхэв үү.

Угтаа, орой болгон гэ­рийн хойморт урилгагүй залран хэрэглэгч танд л хямд үнэтэй, чанартай шинэ бүтээгдэхүүн өглөө бүр өргөн сонголттойгоор өргөн барина хэмээдэг “Миний дэлгүүр”-ийнхэн биднийгээ “хошгируулагч” аж. Худалдаа гэдэг хүнд үйлчилдэг салбар. Эрүүл мэнд, боловсролын салбарын адил харилцааны ёс зүй, дэг журам, хариуцлага, үүргийн ухагдахуун үйлчилнэ. Гэтэл сүүлийн үед манай худалдааны салбарт эдгээр зарчим алдагдсан төдийгүй хэрэглэгч та хаан хэмээн цаасан малгай төдий өмсгөн загнаж, зандрах битгий хэл зодох нь энүүхэнд. Хэрэглэгчийн эрхийг хамгаа­лах төвд энэ талаархи гом­дол ирдэг ч барагдуулсан то­хиол­дол үгүй. Тиймдээ ч энэ салбарт гарч буй догол­дол, зөрчлүүд өнөөг хүртэл амь бөхтэй оршсоор байгаа биз. Үнэндээ, “Миний дэлгүүр” нь хотын төв, захад 20 гаруй салбар дэлгүүртэй, өөрийн гэсэн итгэмжлэгдсэн лаборатортой томоохон ху­далдааны байгууллага. Гэтэл бусад дэлгүүрт байхгүй давуу талтай гэж “онгирох” тус дэлгүүрийн худалдаалж буй хүнсэнд яагаад хорхой үсэрч орчихдог, жимс жимсгэнэ юуны учир мууддаг нь нэн хачирхалтай.

Магадгүй, мөнгө цагаан нүд улаан гэгчээр хэдэн тон­ноор нь татсан бараа бү­тээг­­дэхүүнээ дуустал нь бор­луулахын тулд ар­чиж, зүлгээд ч хамаагүй бор­луул­даг байж мэдэх л юм. Харин энэ мэт хэрэглэгчийн эрхийг байнга зөрчдөг байгууллагад ямар ч хатуухан хариуцлага тооцдоггүй нь гачлантай. Энэ талаар МХЕГ-ын худалдаа үйлчилгээ хариуцсан нэгэн мэргэжилтэн “Худалдааны бай­гууллага зөрчил гар­га­вал хуулийн хүрээнд тор­го­хоос  өөр ямар ч арга хэм­жээ байхгүй” хэмээсэн. Тэ­гэхээр торгуулийн хууд­санд дөжирчихсөн тус бай­гууллагынхан төрийн болон төрийн бус байгууллагынхны үгийг үл ойшоох нь ч аргагүй мэт.

Ямартай ч, хэрэглэгч та хаан гэж лоозогнохоосоо илүү амьд явах баталгааг минь хангаж өгөхийг МХЕГ бо­лон төрийн бай­гуул­лагуу­дын удирд­лагаас хүсье. Олон хавар нэгэндээ гэгчээр хү­­ний аминд хүрэхээс нь өм­нө муудсан хүнс, хор­хой­­­гоор “баяжуулсан” ба­раа бүтээгдэхүүн шахдаг дэл­­гүүрүүдэд хатуухан арга  хэм­жээ авах цаг болсныг ч уламжилъя.
Дэлхийн стан­дартад нийц­сэн сүлжээ дэлгүүр бай­гуулах гэж зориг шу­луудсан гэх “Миний дэл­гүүр” нэртэй сүлжээ дэлгүүрийн захир­гааныханд хандахад муу нэрийг хусав ч арилахгүй гэж үг байдгийг л сануулъя.