Улс орон даяар ургац хураалтын ажил ид өрнөж байна. Хэдийгээр цаг хугацааны хувьд жаахан оройтсон ч ойрын өдрүүдэд цаг агаар тогтуун байвал долоо хоногийн хугацаанд ургацаа хураан авах боломжтой гэж мэдэгдэж байсан.
2013 оны Ургацын урьдчилсан балансаар 423.4 мянган тонн үр тариа, үүнээс 404.6 мянган тонн буудай, 211.8 мянган тонн төмс, 103.4 мянган тонн хүнсний ногоо, 65.2 мянган тонн тосны ургамал, 21.0 мянган тонн малын тэжээлийн ургамал хураан авахаар тогтоогдсон. Тэгвэл энэ сарын 10-ны байдлаар 60.9 мянган га-г ангилан хадаж, 54.4 мянган га-г цайруулж, 178.6 мянган га-г шууд хурааж нийтдээ 233.0 мянган га-гаас 306.4 мянган тонн үр тариа, 13.7 мянганга-гаас 176.1 мянган тонн төмс, 7.6 мянган га-гаас 96.9 мянган тонн хүнсний ногоо, 11.6 мянган га-гаас 37.1 мянган тонн тэжээлийн ургамал, 34.1 мянган га-гаас 24.1 мянган тонн тосны ургамал хураан авснаар үр тарианы хураах ажил 80.3 хувь, төмс 90.7хувь, хүнсний ногооны хураах ажил 94.3 хувьтай байгааг салбарын яамнаас мэдээллэж байна.
Ургац хураалтын явцыг өнгөрсөн оны мөн үетэй харьцуулахад үр тариа 26.3 хувь байгаа бол төмс, хүнсний ногооны хураалт өнгөрсөн оны мөн үеийн түвшинд байна.
Цаг уур орчны шинжилгээний газраас ирүүлсэн мэдээллээр өнөөдрөөс баруун зүгийн нутгийн хойд хэсгээр, 12-нд баруун болон төвийн нутгийн хойд хэсгээр, 13–нд зарим газраар хур тундас, цас орж 13 хэм хүрч хүйтрэх төлөвтэй байгаа гэнэ. Энэ мэдээг орон нутгийн ургацын штабд хүргүүлж шуурхай арга хэмжээ авах чиглэл өгчээ.
Ургац хураалтын ажилд 1980 цэргийн албан хаагч, сонсогч 600 гаруй оюутан залуучууд гэрээгээр ажиллаж байгаа аж.