Манай улс “Хүний хөгжил” сан нэрээр Хятадын Чалко компаниас 250 сая ам.доллар авч ард иргэддээ тараасан түүхтэй. Энэ мөнгөний оронд нүүрс өгөх учиртай. Тэгвэл энэ жил нүүрсний экспортын хэмжээг нэмэгдүүлж, эл өрийг энэ жилийн эцэс гэхэд барагдуулна гэдгийг Уул уурхайн сайд Д.Ганхуяг хэллээ. “Эрдэнэс Таван Толгой“ ХК 2013 онд Цанхийн зүүн уурхайгаас 4.5 сая тонн, Цанхийн баруун уурхайгаас 3 сая тонн, нийт 7.5 сая тонн нүүрс олборлох зорилттой ажиллаж байгаа гэнэ. Ингэснээр 2012 онд олборлон, экспортолсон нүүрсний хэмжээг гурав дахин нэмэгдүүлж байгаа гэнэ.
Ний олборлосон нүүрсний 4.5 сая тн-ыг буюу зүүн Цанхиас олборлосон нүүрсээрээ Чалкогийн өрийг дарах бол Баруун Цанхиас олборлосон гурван сая тонн нүүрсээрээ экспортын орлогоо нэмэгдүүлэх аж.
 “Эрдэнэс Таван Толгой” ХК-ийн Цанхийн баруун талбайд уулын ажлын үйлчилгээ үзүүлэх гэрээт олборлогчоор “Хишиг Арвин Индиусртал”, “Мера”, “Монголын Үндэсний олборлогч” компанийн “Монгол уурхайчид” түншлэл шалгаран олборлолтыг чанартай гүйцэтгэж байна. Цанхийн баруун уурхай буюу Баруун Цанхи 1,2 тэрбум тонн нүүрсний нөөцтэйг тогтоосон. Цанхийн баруун уурхайн нүүрсний экспорт энэ сарын 5-ны өдөр эхэлсэн бөгөөд энэ сарын 22-ны байдлаар 636 машин нүүрс буюу 63,754 мянган тонн нүүрс тээвэрлэжээ. Нүүрс экспортлох гэрээг БНХАУ-ын Вэнсвэй, Пушин зэрэг таван компанитай хийгээд байна.