Орон нутгийн бизнес эрхлэгч иргэд, ААН, хувийн хэвшлийн байгууллагуудын үйл ажиллагааг дэмжих зорилгоор Өмнөговь аймгийн ЗДТГ болон холбогдох байгууллагуудын хамтын оролцоотойгоор “Говь фестиваль” арга хэмжээг зохион байгуулдаг билээ. Жил болгоны намар уламжлал болгон зохиогддог энэхүү арга хэмжээ 2005 оноос хойш тогтмол зохиогдож ирсэн бөгөөд 2013 оны “Говь фестиваль” арга хэмжээ өнгөрсөн амралтын өд­рүүдэд Даланзадгад хо­тод амжилттай болж өндөрлөлөө. 

Энэхүү арга хэмжээнд Өмнөговь аймгийн Засаг дарга Б.Бадраа, Засаг даргын орлогч Д.Нацагдорж болон бусад хэлтэс, агент­лагийн дарга нар оролцсон байна. Энэ үеэр аймгийн Засаг дарга Б.Бадраа хэлэхдээ “Говь фестиваль арга хэмжээг зохион байгуулаад есөн жил болжээ. Энэ арга хэмжээ жил болгон нэг ахиц дэвшил, нэг шинэчлэл гарч байна. Тийм учраас орон нутгийн ард иргэдэд хэрэгцээтэй, үр өгөөжтэй болж байгаад итгэлтэй байна” хэмээн онцолсон юм.  

“Говь фестиваль” үзэсгэлэн худалдаа нь тухайн жилийн шилдэг бүтээгдэхүүнүүдийг тодруулах, малчид иргэд бизнес эрхлэгчдийн түнш­лэ­лийг нэмэгдүүлэх, бүтээг­дэхүүнээ борлуулахад нь дэмжлэг үзүүлэх зорил­го­той. Цаашлаад энэхүү арга хэмжээнд оролцогчид бие биенээсээ харилцан турш­лага солилцох, зах зээлээ өргөжүүлэн үйл ажиллагаагаа сурталчлах боломж олгодог. Ес дэх жилдээ зохиогдсон энэхүү арга хэмжээнд тус аймгийн 15 сум, хөрш зэргэлдээ аймгууд болон Улаанбаатар хотоос нийтдээ 120 гаруй байгууллага, ААН, иргэд оролцжээ. Үзэсгэлэн худалдаанд оролцогчид энэ өдрүүдэд хүнсний бүтээг­дэхүүн, сүү, цагаан идээ, гар урлалын бүтээгдэхүүн, хүнсний ногоо, барилгын материал, эсгий, мод модон эдлэл зэрэг бүтээгдэхүүнүүдийг ард иргэдэд худалдаалсан байна. 
Эл “Говь фестиваль”-ийн хамгийн гол үзүүлэлт нь тухайн арга хэмжээний үеэр борлуулагдсан борлуулалтын орлого байдаг. Энэ жилийн хувьд ойролцоогор 123 сая төгрөгийн худалдан авалт хийсэн дүн гарчээ. Тухайлбал, сүү цагаан идээ 20 сая, төмс хүнсний ногоо 40,3 сая, гар урлалын бүтээгдэхүүн 21,6 сая, монгол гэр, мод модон эдлэлийн бүтээгдэхүүн 20 сая төгрөгийн борлуулт хийжээ. 
Даланзадгад хотноо хоёр өдрийн турш зохиогдсон “Говь фестиваль-2013” арга хэмжээ энэ өдрүүдэд шилдгүүдээ тодруулж шагналаа гардуулсан. Өмнөговь аймгийн энэ жилийн “Газар тариалангийн шилдэг бүтээгдэхүүн”-ээр “Их говийн төгөл” ХХК-ийн Чацаргана жимс, “Шилдэг цагаа идээ” төрөлд Гурвантэс сумын “Гоёот” багийн малчин О.Октябрийн “Ээзгий” бүтээгдэхүүн, “Шилдэг марке­тингтай бизнес эрхлэгч”-ээр “Тангадра” ХХК-ийн захи­рал Мааманхүү, “Шилдэг үйлдвэрлэгч” номинацид “Ёлын домог” ХХК шалгарсан байна.

Харин “Шилдэг барилга, гэр ахуйн бүтээгдэхүүн”-ээр “Гал­тууд” ХХК-ийн тоосго, “Шил­дэг хоршоо”-гоор Хан­хонгор сумын “Нандин дуулга” хоршоо, “Шилдэг оёд­лын бүтээгдэхүүн”-ээр Ц.Бада­мын зүймэл урлал бүтээг­дэхүүн, “Шилдэг гар урлалын бүтээгдэхүүн”-ээр Б.Отгоны эсгий урлалын бүтээгдэхүүн шалгарсан бол “Хамгийн сайн зохион байгуулалттай оролцсон сум”-аар энэхүү арга хэмжээнд тасралтгүй оролцож буй Баян-овоо сум шалгарчээ. Харин “Говь фестиваль-2013” арга хэмжээний “Шилдгийн шил­дэг” буюу “Гран при” шагналаар Даланзадгад сумын иргэн, зу­раач Б.Чулуун­баатарын “Нутгийн намар” бүтээл шалгарсан байна.