Үндэсний цэцэрлэгт хүрээлэнд дөрвөн төрлийн хөдөлгөөн, гурван төрлийн гэрлэн чимэглэл, автомат тохиргоотой 17 ам.метр талбай бүхий усан оргилуур өнөөдөр нээгдлээ. Нээлтэд нийслэлийн Засаг даргын Экологи, ногоон хөгжлийн асуудал хариуцсан орлогч Т.Бат-Эрдэнэ, Үндэсний цэцэрлэгт хүрээлэнгийн дарга Б.Саранчимэг, НИТХ-ын төлөөлөгч Г.Ганхүү нар оролцов. Усан оргилуурыг БНХАУ-ын Эрээн хотын Засгийн ордны 100 хувийн хөрөнгө оруулалтаар хийж гүйцэтгэжээ. Хүүхэд, залуусын чөлөөт цагаа ая тухтай өнгөрөөх орчныг бүрдүүлэх зорилгоор байгуулж буй Үндэсний цэцэрлэгт хүрээлэн нийт 300 га газрыг хамрахаас одоогоор 30 га талбайг тохижуулаад байна. Нийслэлийг "Эко" хот болгох төслийн хүрээнд Үндэсний цэцэрлэгт хүрээлэнд дөрвөн тэрбум төгрөгийн  хөрөнгө оруулалтын ажлыг хийжээ. Цаашид 2.6 км дугуйн замын гэрэлтүүлэг, явган, гүйлтийн, цанын 2.4 км хосолсон замыг гэрэлтүүлгийн хамт хийж гүйцэтгэхээр төлөвлөсөн байна.