Нийслэлд хаа сайгүй өрнөж буй бүтээн байгуулалтаас хамгийн эрчимтэй нь зам засварын ажил юм. Ялангуяа богино хугацаанд дуусч, бодит үр дүнгээ мэдрүүлдэгээрээ замын шинэчлэл онцгойд тооцогдоно. Хэдийгээр зам хаах үед жолооч, зорчигчдыг бухимдуулдаг ч засварын дараагаар түгжрэлгүй, бухимдалгүй амьдарна гэдгийг олон нийт ойлгон хүлээн авч байгаа аж. Өнөөдрийн байдлаар нийслэлийн Баянзүрх дүүргийн Сансарын туннель руу өгссөн 0.9 км авто замыг хаагаад байна. Зүүн дөрвөн замаас эхлэлтэй замыг хааж засвар шинэчлэхэд гурав хоног хангалттай хэмээн гүйцэтгэгч Улаанбаатар зам засвар арчлалт компани үзжээ. Өчигдөр орой 22 цагаас эхлэн хаасан замын хөдөлгөөнийг нөгөөдөр буюу наймдугаар сарын 1-нд нээх юм. Харин Сансарын туннелиэс хойш аюулгүйн тойрог хүртэлх замыг наймдугаар сарын 5-ны өдөр хүртэл хааж засварлах юм байна.
Түүнчлэн “Гялс” төвийн уулзвараас зүүн чиглэлд Баянзүрх дүүргийн ЗДТГ-ын байр хүртэлх нэг км авто замын урд урсгалыг гурван өдөр хаасан. Өнгө хучилт болон замын тэмдэглэгээний ажил гүйцэтгэхэд гурван өдөр шаардагдах аж. Тиймээс иргэд ирэх сарын 1-н хүртэл Сансарын аюулгүйн тойргийн арын зам болон Нарантуул худалдааны төвийн урд замыг сонгон зорчих боломжтой. Нарантуулаас Чулуун-Овоо хүртэлх хоёр км зам өнөөдөр бүрэн нээгдэж байгаа тул замын түгжрэл харьцангуй бага байх юм. Мөн өнөөдөр Хан-Уул дүүргийн XIX хорооллын арын замын хөдөлгөөнийг нээлээ. Бороо хур, цаг агаарын байдлаас шалтгаалж замын ажил нэг хоног хойшилж, өнөөдөр ашиглалтад орж буй нь энэ юм.
