Өнөөдөр газар сайгүй наадам, аймаг орон нутгийн ой болж байна. Хэнтий, Завхан, Архангай, Төв аймгууд 90 жилийн ойгоо тэмдэглэж байгаа бол Дорноговь аймаг говийн догшин ноён хутагт Данзанравжаагийн мэлмий гийсний 210 жилийн ойг тэмдэглэж байна.
Саявтархан үндэснийхээ их баяр наадмыг Хүннү гүрэн байгуулагдсаны 2222, их монгол улс байгуулагдсаны 807 жилийн ойтой хамтатган тэмдэглэсэн монгол түмэн улсынхаа Засаг захиргааны анхны шинэ хуваариар үүссэн дөрвөн аймгийн том ойд хуваагдан очиж, наадацгааж  байна.
Завхан аймгийн баяр наадам өчигдөр эхэлсэн бол Төв, Архангай, Хэнтий  аймгуудын баяр наадам өнөөдөр эхэлж байна. Дорноговь аймагт говийн ноён хутагтын IX дүр Дэнзэнлувсантүдэв сүсэгтэн олондоо хандан ном сургааль айлдаж байгаа юм байна.
Дөрвөн аймгийн ой, баяр наадамд УИХ-ын гишүүдээс гадна, нийслэл дэх улс, хотын бараг л байгууллагын дарга мяндагтнууд гээд нутаг нутгийн нь иргэд зорьж одсоноос Улаанбаатар хот эль хульхан байна.