Сүхбаатар дүүргийн XV хороо буюу Дамбадаржаагийн хуучин эцсийг “Гудамж” төслийн хүрээнд шинэчлэн засварлаж, гэрлэн дохио тавилаа. Нийслэлийн авто замын 33 уулзварыг өргөтгөн шинэчлэх ажлын тоонд Дамбадаржаагийн хуучин эцсийн гурван замын уулзвар багтсан юм.
Зохих тэмдэг тэмдэглэгээ, гэрлэн дохио байхгүйгээс өмнө нь байнга түгжрэл үүсдэг, тээврийн хэрэгсэл болон явганаар зорчих, тухайн орчны худалдаа үйлчилгээний газруудаар үйлчлүүлэхэд хүндрэлтэй, хөдөлгөөний зохион байгуулалт нь эмх замбараагүй байсан энэ уулзвар одоо гэрлэн дохиотой, авто замын зохих тэмдэг тэмдэглэгээтэй боллоо. Мөн тээврийн хэрэгслийн зорчих хэсэг нь өмнөхөөсөө өргөн, явган зорчигчийн зориулалтын замтай болжээ.
Гэр хороолол дахь уг уулзварыг хөдөлгөөний зөв зохион байгуулалттай болгож, өргөтгөн шинэчлэх ажлын зураг төслийг “Эйч Ай Би” ХХК боловсруулж, “Арц Суварга” ХХК зам барилгын ажлыг гүйцэтгэжээ.
