Дуучин, жүжигчин Жей Ло сүүлийн үед ядам хуруундаа байнга бөгж зүүж явах болсон нь түүнийг сүй тавьсан гэх цуу яриаг гаргаад байна. Ямартай ч Жей Ло хамгийн анх Латин америк гаралтай дуучдын нэгэн ёслолын үеэр ядам хуруундаа алмаазан бөгжтэй харагдсан бол, хамгийн сүүлд Нью-Йоркт нэгэн брэндийн дэлгүүрийн нээлтэд оролцохдоо ч мөн тэр бөгжөө зүүсэн байжээ. Тэр нь зүгээр ч нэг бөгж биш, алмаазан шигтгээтэй үнэтэй эд учраас дуучны найз залуу Каспер Смартын сүйн бэлэг байх гэж хэвлэлүүд таамаглаж байгаа юм. Гэвч дуучны хэвлэлийн төлөөлөгч дээрх яриаг үгүйсгэсэн байна.
Хэрэв дээрх яриа үнэний ортой байсан бол 44 настай дуучин Жей Логийн хувьд дөрөв дэх сүй нь байх байлаа. Тэрээр өөрөөсөө 18 насаар дүү, бүжигчин залуутай болздог болсноос хойш даруй хоёр жил өнгөрөөд байгаа юм. Тэрээр өмнө нь гурван ч удаа гэр бүлийн амьдрал зохиож байсан билээ.
