Ирэх сарын 1-нээс замын хөдөлгөөний шинэ журам мөрдөгдөж эхэлнэ. Журамд дүрэм зөрчиж камерт өртсөн жолооч нарт торгуулийн хуудсыг гэрийн хаягаар нь хүргэж өгөхөөр тусгасан. Гэсэн ч шинэ  журамд толгой эргүүлсэн ойлгомжгүй олон асуудал бий. Тиймээс шинэ журмыг хэрэгжүүлэх бэлтгэл ажил хэрхэн хангагдаж байгаа талаар Замын хөдөлгөөний удирдлагын төвийн дарга Л.Батцоожоос тодрууллаа.

-Шинэ журмыг хэрэг­жүүлэхэд олон будлиантай асуудал байна л даа. Ту­хайл­бал, тухайн зөрчил гар­гасан жолооч хаяг дээ­рээ амьдардаггүй бол яах вэ. Мөн хүний машин жо­лоо­дож байгаад зөрчил гар­гасан тохиодолд хэнд нь тор­гуулийн хуудас явуулах вэ?
-Хэрвээ иргэн бүртгэлтэй хаяг дээрээ амьдардаггүй бол үүрэн телефоны оператороор дамжуулан гар утсанд нь мессеж  явуулах, хорооны зо­хион байгуулагчидтай хамтран ажиллаж, торгуулийн хуудсыг зөрчил гаргасан этгээдийг олж хүргэнэ. Харин тухайн иргэний машиныг өөр хүн барьж яваад зөрчил гаргасан тохиолдолд торгуулийн хуудас зөвхөн автомашин эзэмшигчид очих юм.
-Тэгвэл албан бай­гуул­лагын нэр дээр байдаг авто ма­шин зөрчил гаргавал торгуулийн хуудас хаана очих вэ. Үүгээр ч зогсохгүй нэг албан байгууллагын ма­шиныг 2-3 жолооч барьдаг тохиолдол бий. Ийм үед яах вэ?
-Торгуулийн хуудас албан байгууллагын нэр дээр очно.  Камераас аль жолооч нь зөрчил гарсан бэ гэдгийг харж болно. Камер нь автоматжуулсан системтэй учир тээврийн хэрэгслийг аль замд, хэзээ, хэдэн км цагийн хурдтай орсныг болон аль уулзварт хэдэн цагт улаан гэрлээр нэвтэрснийг зураг, бичлэгээр баталгаажуулан гаргана. Өөрөөр хэлбэл, зөрчлийн тухай мэдээлэл Замын хөдөлгөөний удирд­лагын төвөөс автоматаар хэвлэгдэн гарна гэсэн үг. Тэгээд тухайн өдөр компанийн машиныг аль жолооч барьж байсан гэдгийг цаг минутаар нь мэдэх боломжтой.
-Орон нутгийн иргэн нийслэлд дүрэм зөрчсөн тохиолдолд ямар арга хэмжээ авах вэ?
-Орон нутгийн дугаартай автомашины жолооч Улаанбаатар хотын автозамын хөдөлгөөнд оролцож байхдаа дүрэм зөрчсөн тохиолдолд ч торгуулийн хуудас тухайн автомашин эзэмшигчийн хаягаар орон нутагт нь очно.
-Төлбөрийг нь хэрхэн хийх талаар мэдээлэл өгөхгүй юү?
-Замын хөдөлгөөний хя­налтын төхөөрөмжид  бүрт­гэгдсэн зөрчил гаргасан тээврийн хэрэгслийн эзэм­шигчид Захиргааны хариуц­лагын тухай хуульд зааснаар зөрчил гаргагч нь торгуулийн хуудсыг хүлээн авсан өдрөөс хойш 14 хоногийн  дотор төлбөрийг Улаанбаатар хо­тын банкны Төрийн сангийн дансанд тушаах үүрэгтэй. Мөн  зөрчил гаргагч тор­гуулийн  хуудсыг хүлээн авснаас 10 хоногийн дотор гомдол гаргах эрхтэй. Зөрчил гаргасан тохиолдолд тээврийн хэрэгслийн бүртгэлийн мэ­дээллийг “Үндэсний Дата Төв”–өөс авч, торгуулийн мэдээллийг тээврийн хэрэгсэл эзэмшигчийн хаягаар "Монгол шуудан" Төрийн өмчит хувьцаат компани хариуцан хүргэх юм.
-Торгуулийн хуудсыг "Монгол шуудан" Төрийн өмчит хувьцаат компани  хүргэх юм байна. Тэгэхээр жолооч нараас торгуулийн хуудас хүргэсний төлбөр гэж авах уу?
-Жолооч нар ямар нэгэн илүү төлбөр төлөхгүй. Зөвхөн торгуулийн мөнгөө төлөх үүрэгтэй. Хүргэлтийн мөнгийг нийслэлийн төсөвт суулгасан.
Бэлтгэл ажлууд үндсэндээ хангагдсан. Одоо сургалт сурталчилгааны талд дээр илүү анхаарал хандуулж байна. Цаашдаа замын хяналтын камерыг нэмж суурилуулах төлөвлөгөөтэй бий.