Монгол Улсад Хил хамгаалах байгууллага үүсч хөгжсөний 80 жилийн ойн баярын цэргийн ёслолын жагсаал өнөөдөр Төв цэнгэлдэх хүрээлэнд боллоо.
Улсынхаа хил хязгаарыг сахин хамгаалах амин чухал үүрэгтэй энэ салбарынхны ой энэ өдрүүдэд тохиож, өчигдөр ойн баярын хүндэтгэлийн концерт, хүндэтгэлийн хурал, мөн түүхт ойд зориулсан гэрэл зургийн үзэсгэлэнг нээсэн юм. Тэгвэл өнөөдөр ёслолын гол арга хэмжээ болох Төв цэнгэлдэх хүрээлэн дэх цэргийн ёслолын жагсаал болон хилчдийн үзүүлэх тоглолтыг ард олондоо толилуулж байна. Цэргийн ёслолын жагсаалд хилийн цэргийн анги нэгтгэлүүдээс гадна ахмад хилчид, хилийн цэргээр овоглосон тамирчид, Хилийн цэргийн дуу бүжгийн чуулгын уран бүтээлчид гээд энэ их айлд багтдаг бүхэн оролцсоны дээр орчин цагийн хилийн техник хэрэгслийг дэлгэн үзүүлсэн юм. Цэргийн ёслолын дараа хилчдийн ур чадварыг илтгэх гардан тулаан, албаны нохдын үзүүлэх тоглолт, хил зөрчигчдийг хэрхэн саатуулж буйг харуулсан тоглолт зэргийг толилуулсан нь үзэгчдийн сонирхлыг их татлаа. Энэхүү ёслолын арга хэмжээний дараа ойд зориулсан хүчит бөхийн барилдаан болох юм байна.
