Техник технологи хөгжиж, хаа сайгүй ажиглалтын камертай болсон нь гэмт хэрэг зөрчлийн тоог цөөрүүлж нийгмийн хэв журмыг сайжруулахад чухал үүрэг гүйцэтгэж байгаа. Одоо манай цагдаагийнхан гудамж замын хөдөлгөөнд оролцох үедээ зөрчил гаргасан жолоочийг камерын дүрс бичлэгээс хараад гэрийн нь хаягаар торгуулийн нэхэмжлэл явуулж байх болж байна. Хөдөлгөөнд оролцох үедээ таны санамсаргүй үйлдсэн зөрчлийн төлөөс хэзээ ч хамаагүй гэрт чинь” хүрээд очих” нь.  Одоо жолооч нарын хувьд ийм нэхэмжлэл байн байн аваад байхгүйн тулд ажиглалтын камераас “зугтаах” л үлдэж байх шив дээ. Камерт өртөхгүй гээд машинаа унахгүй байлтай биш.
Ажиглалтын камерт өртөж, торгуулийн мөнгөний нэхэмжлэл авахгүй байх хамгийн шилдэг, цорын ганц арга бол хотын хөдөлгөөний дүрмийг чанд мөрдөх л дөө. Гэхдээ алив юманд арга чарга байдаг даа. Улаан цайм том осол гаргачихаагүй бол шүү дээ.
Ажиглалтын камерт өртөхгүй байх талаар оросын жолооч нарын “боловсруулсан” таван арга энэ байна.
    1.    Радар-детектор. Үүнийг “анти радар” буюу радарын эсрэг гэдэг ч энэ нь тийм биш. “Антирадар” бол замын ажиглалтын камеруудын ажиллагаанд сөрөг нөлөөлөл үзүүлдэг, тэгээд ч өндөр үнэтэй төхөөрөмж. Өөрөөр хэлбэл дохиог саармагжуулдаг. Гэхдээ үүнийг хэрэглэхийг хуулиар хориглосон.
Харин детектор бол өөр төхөөрөг. Энэ бол ердөө л ажиглалтын камер ойртож байгааг танд мэдээлэх үүрэгтэй багаж. Тэгээд ч ийм төхөөрөг ашиглахыг хуулиар хориглоогүй.

    2.    Гар утсандаа “Яндекс”-ын дохиоллын программ суулгах. Энэ мөн л замын хөдөлгөөний нөхцөл байдлыг төдийгүй ажиглалтын камер ойртож байгаа тухай мэдээллийг таньд өгнө. Мэдээж үүний тулд гар утсандаа интернет суулгаж, тухайн программын төлбөрийг үүрэн телефоны оператортоо төлсөн байх шаардлагатай. Харин манайд замын хөдөлгөөний талаарх ийм мэдээлэл интернетэд хараахан байхгүй л болов уу.

    3.    Навигатор. Энэ бол зүгээр л ажиглалтын камер хаана хаана байрлуулсныг мэдэж байх гэсэн үг. Манайх шиг замууд нь камер бүү хэл тэмдэг тэмдэглэгээ багатай оронд ажиглалтын камер хаана хаана байдгийг мэдээд авахад нэг их зардал орохгүй.

    4.    Машины урсгалд холилдох. Дээр өгүүлсэн гарын дорхи материал тоног төхөөрөмж байхгүй бол машиныхаа дугаарыг камерт мэдрүүлэхгүйн тулд олон машины урсгалд орох нэг арга байна. Камер хаана байгааг мэдэж байгаа бол, машин чинь ямар нэгэн зөрчилтэй бол олон машины урсгалд орж дугаараа харуулахгүй байж нэг болох юм даа.

    5.    За тэгээд хамгийн найдвартай арга бол ямар ч зөрчил гаргахгүйгээр, хурд хэтрүүлэхгүй байх явдал даа. Мэдээж хот орчин, хөдөөгийн замд ямар хурдтай явахыг замын хөдөлгөөний дүрэмд заагаад өгчихсөн болохоор үүн шиг амар юм гэж үгүй.