2011 онд дэлхийд цуутай хурим нэг биш удаа болсны нэг нь Монакогийн хунтайж II Альберт үзэсгэлэнт сүйт бүсгүй Чарлен Уиттстоктойгоо гэрлэлтээ ёсчлон батлуулсан хурим байсан. Их Британийн ханхүү Уильямын зартай хуримнаас хэдхэн сарын дараа болсон ч сүр хүч, тансаг байдлаараа ер дутахааргүй болсон Монакогийн удам залгасан хунтайжийн хуримыг дагаад нэлээн дуулиан шуугиан дагуулсан билээ. Хунтайжийн сүйт бүсгүй Чарлен хуримын товлосон өдрөөс хэдхэн хоногийн өмнө сүйт залуутайгаа муудалцсаны улмаас сүйгээ цуцалж, хуримаасаа зугтах гэж оролдсон хэмээн хэвлэлүүд шуугьж, сүмд гэрлэлтийн амлалт өгөх үедээ уйлсан нь ч үүнтэй холбоотой хэмээн тайлбарлаж байсан. Тэгвэл энэ явдлаас гурван жилийн дараа Чарлен энэ бүхнийг үгүйсгэж ярилцлага өгчээ. Тэрээр хэлэхдээ хуримынхаа үеэр уйлсан нь баярын нулимс байсан гээд тэр үеэр тарсан бүхэн худал цуурхал гэж мэдэгджээ. Тэрээр гурван өдөр үргэлжилсэн найр хурим нь одоо ч санахад гайхамшигтай сайхан байдаг, хунтайжтай зохиосон амьдрал нь бүтэмжтэй сайхан байж, ирээдүйд хүүхэдтэй болохоор төлөвлөж байгаа хэмээн ярьжээ. 
