90-ээд оны үед монголчууд бараг л бүгд байгаа хэдэн бор юмаа халааслаад Эрээн лүү ганзагын наймаанд мордсон. Одоогийн ихэс дээдэс бүгд л энэ замыг туулсан байдаг. Монголын бизнесийн акулууд дотроос ганзагын наймаанд хамгийн туйлбартай зүтгэсэн хүн бол "Шунхлай" группийг үүсгэн байгуулагч Г.Батхүү хэмээн учир мэдэх хүмүүс ярьдаг. Аав ээжийгээ дагаж ганзагын наймаанд 17-хон наснаасаа зүтгэсэн Ч.Ганхуяг өдгөө Хас банкны эзэн сууна. Ер нь шилжилтийн гэх тэр цагт бүгд л ганзагын наймаанд явж байсан юм. Алтны магнат Ц.Мянганбаяр ч мөн Орост оюутан байхдаа 130 рублиэр трельяж буюу айл болгонд л байдаг байсан хавтастай толь зөөн Монголд 1100 төгрөгөөр зарж бизнесийнхээ гарааг эхэлсэн гэдэг. Эрхэм Ерөнхий сайд Н.Алтанхуяг ч бас бусдын жишгээр ганзгын наймаанд явж байсан нэгэн. Засгийн тэргүүн энэ эрхэм Эрээн Эрхүү хоёын хооронд амьдралынхаа нэг хэсгийг өнгөрүүлсэн. Тэгэж яваад дээрэмдүүлсэн гэдгийг тэр болгон хүн мэдэхгүй. Н.Алтанхуяг овоохон олзтой явж байгаад нэг удаа Эрхүүд буу тулгуулан, байдгаа сэгсрүүлж байсан гэдэг. Хамаг бэлэн мөнгөө дээрэмдүүлэн наймаачдын ярьдгаар ёстой л "цөм шатаж" байжээ.