Монгол Улсын Засгийн газрын тусгай сан болох “Цэвэр агаар сан”-гийн нягтлан н.Хуланг их хэмжээний мөнгө шамшигдуулсан хэргээр өнгөрсөн амралтын өдрүүдэд Дархан-Уул дахь гэрээс нь баривчилсан. Тэгвэл эл хэрэгт уг санг толгойлдог Н.Хүрэлсүх холбоотой нь илэрч нийслэлийн Прокурорын газраас няравтай нь хамт баривчлан саатуулжээ. Эх сурвалжийн хэлж буйгаар “Цэвэр агаар сан”-гийн дарга эрх мэдэл, албан тушаалаа урвуулан ашиглаж өөрийн үүсгэн байгуулсан компани болон нэр бүхий гурван аж ахуйн нэгжид сангийн хөрөнгөөс нягтлан бодогч, нярав, мэргэжилтэн нартайгаа бүлэглэн шилжүүлсэн гэнэ. Гэрээний харилцааг ашиглан төсвийн мөнгийг шилжүүлсэн үйлдэлд нь сангийн захирал нарын таван хүнд  Эрүүгийн хуулийн 150.3  буюу аж ахуйн нэгж, байгууллага, иргэдийн өмчийг итгэмжлэгдэн хариуцсан этгээд завшсан, 263.2 буюу албан тушаалаа урвуулсан, 273,3 буюу төсвийн хөрөнгө зориулалтын бусаар зарцуулсан гэх үндэслэлээр сэжигтнээр татсан аж. Урьдчилсан байдлаар тэднийг гурван тэрбум 56 сая төгрөгийн хохирол учруулсан хэрэгт шалгаж байна.