Рок дуучин Аврил Лавин өнөөдөр Францын Канн хотод хуримын ёслолоо хийх гэж байна. Түүнийг өнгөрсөн бямба гаригт хуримаа хийсэн гэж хэвлэлүүд шуугьж байсан ч хуримын ёслол хараахан болоогүй байжээ. Дуучин бүсгүй гэр бүл, ойр дотны найз нөхдийн хүрээнд хуримаа чимээгүйхэн хийхийг хүссэн ч хэвлэлүүд аль хэдийнэ энэ тухай бичээд эхэлжээ. Уригдсан зочин бүрийг алмайруулах онцгой хурим хийхийг мөрөөддөг гэж ярьдаг Аврил анхны нөхрөөсөө салсны дараа өнгөрсөн зун тав дахь цомгоо бичүүлж байхдаа одоогийн сүйт залуу Чад Крогертой танилцсан юм. Тэд танилцаад ердөө нэг сарын дараа сүй тавьсан гэдэг. Чад Аврилын тухай нэгэн ярилцлагадаа”Дэлхийгээр тойрон аялж, хэдэн мянган хүний өмнө дуулахад ч зүрх тэгтлээ хөөрч догдолдоггүй. Харин нэгэн бүсгүйн өмнө өвдөг нугалан суугаад үлдсэн амьдралаа зориулна гэж амлах үнэхээр сэтгэл догдлом мөч байсан. Би өмнө нь хэзээ ч хүнтэй гэрлэхгүй гэж боддог байсан ч Аврилтай учирснаар бодол минь салхинд хийсэх адил замхарсан” гэж ярьсан байдаг.