-СЭЗДС-ийн хэрэгжүүлж буй АССА буюу Олон улсын мэргэшсэн нягтлан бодогч бэлтгэх хөтөлбөр болон гадаадын их, дээд сургуулиудтай хамтарсан олон улсын хөтөлбөр амжилттай хэрэгжиж байгаа гэж сонслоо. Энэ талаар дэлгэрэнгүй мэдээлэл өгнө үү?
-Манай сургуулийн баримталдаг бодлого бол чадварлаг, хаа ч хүлээн зөвшөөрөгдөх мэргэжилтэн бэлтгэн гаргах. Тиймээс ч бид хамтарч байгаа түнш сургуулиа тухайн орондоо хэр нэр хүндтэй, чанартай вэ гэдгийг нь маш их анхаардаг. Хоёр cургууль маань хоёулаа сайн байж чадсан цагт жинхэнэ утгаараа сайн мэргэжилтэн бэлтгэнэ. Тиймээс ч бид Их Британийн Лондонгийн санхүү, бизнесийн сургууль, БНХАУ-ын Далианы их сургууль, Далианы Политехникийн их сургууль, Солонгосын Хандоны их сургууль, Тайваны Азийн их сургууль зэрэг нэр хүндтэй, чанартай сургуулийг сонгон 2+2 хөтөлбөр хэрэгжүүлж байна. СЭЗДС олон улсын мэргэшсэн нягтлан бодогч / АССА / бэлтгэх хөтөлбөрийг хэрэгжүүлээд долоон жил болж байна. Амжилттай сайн хэрэгжиж байгаа болохоор хэдийнэ монголчуудын танил болсон. Маш олон гадаадын хөрөнгө оруулагчид Монголыг сонирхож байна. Эдгээр хөрөнгө оруулагчдад эдийн засаг, бизнес, санхүүгийн мэр­гэжлээр олон улсын түв­шинд ажиллах өндөр чад­вартай, англи хэлтэй бо­ловсон хүчин шаардлагатай. Цаашид ч энэхүү эрэлт улам өсөн нэмэгдэх нь тодорхой. Энэ чиг хандлагыг мэдэрч СЭЗДС өөрийн эх орондоо хямд зардлаар сурал­цан дэлхийн түвшинд мэр­гэж­лээрээ ажиллаж чадах бо­ловсон хүчин бэлтгэх зорил­го тавин ажиллаж байгаа нь мон­голчуудад завшаантай хэрэг юм. АССА цолыг авсан монгол хүн дэлхийн түвшинд үнэ­­лэгдэх боломжтой болох юм.

-Олон улсын мэргэшсэн нягтлан бодогч /АССА/ бэлтгэх хөтөлбөрийг Монголд хэрэгжүүлж буй давуу тал юу вэ. Одоо үед дэлхий ертөнц бидний өмнө нээлттэй болсон. Хүссэн хүн гадаадад очоод сурах боломж бий шүү дээ?
-Дөнгөж ерөнхий боловсролын сургуулийг 16, 17 настайдаа төгссөн,  бүрэн төлөвшөөгүй хүүхэд  гэрээсээ хол, шинэ орчин, хатуу шаардлагатай сургалт, өөр соёлтой нийгэмд орохоороо шоконд орж, гэр орноо санагалзан амжилтгүй сурдаг. Үүнээс болж сүүлийн жилүүдэд эцэг эхчүүд хүүхдээ гадаадад шууд явуулах сонирхолгүй болсон. Монголдоо тэр га­даадын сургуулиудын тавь­даг шаардлага стандартын дагуу ижил программ, сургалтын ижил арга барилаар гадаад багш нараар хичээл заалган шалгалтаа Их Британи дахь АССА нийгэмлэг рүү онлайнаар өгөх боломжтой. Оюутан дэлхийн аль оронд сурч байгаагаасаа үл хамааран энэ зарчмаар хичээлээ үзэж, онлайнаар шалгалтаа өгнө. Тэгэхээр Монголдоо сурахын давуу тал нь хямд зардлаар дэлхийд үнэлэгдэх боломж олж авна. Өөрийн орны эдийн засгийн орчинг таньж мэднэ. Мөн хүнд хамгийн чухал шаардлагатай зүйлийн нэг болох ирээдүйн ажил хэргийн монгол анд нөхдийн холбоогоо бий болгоно. Хатуу чанга шаардлагатай уг хөтөлбөрийн шалгуурыг давснаар цаашид дэлхийн аль ч улсад суралцах, ажиллах бие болон сэтгэлийн хат сууж бэлтгэгдэнэ. Иймээс эцэг эхчүүд хүүхдээ энэ хөтөлбөрт сургах сонирхол ихтэй байдаг л даа. Эндээ сургалтын нэгдүгээр үе шатаа амжилттай төгсч чадсан хүүхэд дараагийн шатанд ямар ч асуудалгүйгээр аль ч улсад сурч чадна. Оюутан эхний шатаа амжилттай төгсөнө гэдэг нь ээж, аавдаа би сурч чадна гэдгээ нотолж буй хэрэг.

-Тэгэхээр дараагийн шатанд оюутан өөр улсын сургуульд шилжин суралцах боломжтой гэсэн үг үү. Одоогоор шилжин суралцсан оюутан бий юү?
-Тийм ээ, тэгж ойлгож болно. Оюутан хүсвэл гадаа­дын аль ч оронд  АССА-гийн дараагийн шатанд шууд үргэлжлүүлэн сурах боломж­той. Одоогоор манай 70 гаруй оюутан Их Британи, Канад, Австрали, Чех, Сингапур, Малайз, Хятад зэрэг оронд АССА-гийн чиглэлээр шилжин сурч байна. Гэхдээ Монголдоо АССА-гийн гурван үе шатаа сурч төгсөхийн давуу тал бий. Монголдоо амжилттай төгсөгчид Их Британийн Оксфорд Брүүкс болон СЭЗДС-ийн бакалаврын цол зэрэг хүртэх боломжтой болно.  Өөрөөр хэлбэл, бид илүү боломж олгохыг л зорьж байна гэсэн үг. Энэ сайхан боломжийг илүү олон залуус хүртээсэй, дэлхийн түвшинд ажиллах, амьдрах боломжоо өөртөө бий болгоосой л гэж хүсч байна даа.

-Ирээдүйд ямар мэргэ­жилтэй болох вэ гэдэг сон­гол­тоо олон залуус одоо хийж байгаа. Эцэг эхчүүдэд нь хандаж юу хэлмээр байна?
-Монгол Улс байгалийн баялгаараа дэлхийн хөрөнгө оруулагчдын харааг булааж байна. Үүнийгээ ажил хэрэг болгоход тэдний шаардлагыг хангасан, өөрөөр хэлбэл АССА зэрэгтэй монголчуудын эрэлт их  байна. Энэ зэргийг авсан монгол залуус өөрийн аудитын компаниа байгуулаад гадаадын компаниудад аудит хийж, бизнесээ эхлэх алтан үе эхэлж байна даа. Ухаантай хүмүүс боломжийг алдалгүй ажил­ладаг юм шүү л гэж хэлье.   

-Олон улсын эдгээр хөтөлбөрийн талаар дэлгэ­рэнгүй мэдээллийг хаанаас авах боломжтой вэ?
-Эдгээр хөтөлбөр болон АССА хөтөлбөрийн талаархи дэлгэрэнгүй мэдээллийг СЭЗДС-ийн 102 тоот  өрөөнд ирж авч болно. Мөн 457701, 99017784, 99027117 утаснаас лавлаж болно.