Монгол Улс газрын тос экспортлогч орон болсон. Өнгөрсөн жил 1.8 сая баррель газрын тос экспортолж Бүтээгдэхүүн хуваах гэрээгээр 332.3 тэрбум төгрөг улсын төсөвт оруулсан тооцоо бий. Өнөөгийн байдлаар сард дунджаар 40 мянга гаруй баррель газрын тос экспортолж буй. Монгол нутагт 1990 оноос хойш газрын тосны хайгуулын ажил идэвхжсэн. Эдүгээ хайгуулын 21 талбайд 16 компани ажилладаг. Одоогоор нэг талбайн Бүтээгдэхүүн хуваах гэрээ дуусч байгаа бол гурван талбайд олборлолт, 17 талбайд хайгуул хийж байна.
Тухайлбал, Хятадын хөрөнгө оруулалттай “Петро чайна Дачин Тамсаг”, “Доншен” компани газрын тос олборлож экспортолж буй билээ. Бүтээгдэхүүн хуваах гэрээгээр газрын тос олборлож буй компани экспортолсон нефтийнхээ 40 хувиар өртгөө нөхөх учиртай. Үлдсэн нь гэрээнд заасан хувь хэмжээгээр улсын төсөвт ордог байна. Бүтээгдэхүүн хуваах гэрээ байгуулсан компаниудын 25 хувь нь Монгол Улсын, 43.8 хувь нь БНХАУ-ын, үлдсэн 31.3 хувь нь бусад орны харъяалалтай юм.
