Дуучин Рианнагийн Антверпэд хийсэн тоглолт үзэгчдийнх нь сэтгэлд хүрсэнгүй. Рианна лхагва гаригт болсон тоглолтдоо  хоёр цаг шахам хоцорч ирчихээд ихэнх дуугаа бичлэг тавьж дуулсан нь үзэгчдийг ихээр бухимдуулжээ. Тэд бүр Рианнаг согтуу байсан байх гэж таамаглаж байгаагаа дуучны Твиттер хаягт хандан бичицгээж байна.   Тэрээр “We found love” дуугаа дуулахдаа хүртэл огтхон ч бүжиглэхгүй байсан нь фэнүүдийгээ үнэхээр гонсойлгож, “Риана согтуу юмуу эсвэл хөшчихсөн юм уу” хэмээн шүүмжилжээ. Дуучин тоглолтынхоо өмнөх шөнө үүрийн дөрвөн цаг хүртэл шоудсан учраас маргаашийнхаа тоглолтод ийнхүү бэлтгэлгүй оролцсон бололтой гэж хэвлэлүүд бичиж байна.  Харин дуучин бүсгүй энэ бүх шүүмжлэлийг үл тоо Парист зугаалж явна. Тэрээр энэ амралтын өдөр Парист мөн тоглолтоо хийх юм.