УИХ-ын гишүүн С.Дэмбэрэлээс тодрууллаа.
-Хувь хүмүүс дансандаа их хэмжээний мөнгөтэй байх нь мөнгө угаасны илрэл үү гэсэн хардлага нийгэмд бий боллоо. Энэ талаар та ямар байр суурьтай байна вэ?
-Би үүнд маш их санаа зовж байна. Мөнгө угаах болон терроризмыг санхүүжүүлэхтэй тэмцэх тухай хуулийг хэлэлцэх үед “Санхүүгийн мэдээллийн алба бие даасан хараат бусаар ажиллаж чадах уу” гэж асуусан. Учир нь, эхний заалтдаа бие даасан, хараат бус гэсэн хэр нь хоёр дахьд нь хэн нэгнээс хараат, Монголбанкны Ерөнхийлөгчийн тушаал шийдвэрээр явдаг байх гэж заасан байна лээ. Хэдийгээр бүтэц бүрэлдэхүүндээ хараат бус байгууллагыг оруулсан гэж байгаа ч надад маш эргэлзээтэй санагдсан. Өөрөөр хэлбэл, мөнгө угаахын эсрэг гэсэн нэрээр хувь хүний нууцад халдах нь. Энэ нь ямар ч шалтгаангүйгээр өөр зүйлийн арга хэрэгсэл болох талтай.
Тиймээс институц буюу мөнгө угаадаг хэрэгтэй тэмцдэг байгууллагуудынхаа хараат бус бие даасан байдлыг хангах ёстой байна. Үүнийг одоогийн баталсан хуульдаа сайн тусгаж өгч чадаагүй. Монголбанкаар дамжуулж мөнгө угааж болно шүү дээ. Түүнийг яаж шалгах юм. Энэ мэтийн асуудлыг сайн хэлэлцээгүй баталчихсан. Хугацаа нь шахуу байсан юм билээ. Хар жагсаалтад орно гээд айчихсан байсан.
-Иргэдийн зүгээс 20 сая төгрөгийн босго тогтоосон нь хэт явцуу гэж шүүмжилж байна. Гэтэл УИХ-ын гишүүний эхнэрийн дансанд их хэмжээний мөнгө байршиж байсан нь илэрлээ?
-Ё.Отгонбаярын эхнэрийн данстай холбоотой мөнгийг би мэдэхгүй байна. Отгонбаярын, Доржийн ч байна уу хэнийнх нь ч дансаар хоёр жилийн хугацаанд 10 гаруй удаа 20 сая төгрөгийн гүйлгээ маш олон хийгдэж байдаг. Тэр бүхнийг шалгах нь зүйтэй байх. Хууль хяналтын байгууллагынхан хүнийг шууд барьж хорьдог, шүүхээр нотлогдоогүй байхад нь гэр бүл рүү ордог, олон нийтэд зарладаг болчихож. Энэ чинь 1930-аад оны арга барил шүү дээ. Үүнийг цаашид цэгцлэх ёстой. Мөнгө угаахын эсрэг гэдэг нэрийн дор ямар нэг улс төрийн үйлдэл хийж болохгүй. Нөгөөтэйгүүр Монгол Улсын иргэдийн халдашгүй дархан эрх болох хувийн нууцад нь нэвтэрч болохгүй. Энэ бүхэнд хязгаартай хандаж, хэзээ, хаана, хэн, яаж гэдгийг хуульчилж, тогтоож өгөх ёстой. Тэгэхгүй бол буруу ашиглагдах хэлбэр байж болзошгүй.
