Ойрын жилүүдэд хэрэгжих томоохон бүтээн байгуулал, дэд бүтцийг шийдвэрлэхүйц ажлыг Засгийн газрын гишүүд өчигдөр эхлүүллээ. Засгийн газрын болон Хөгжлийн банкны бондын хөрөнгөөр санхүүжүүлэх бүтээн байгуулалтын хэд хэдэн гэрээнд гарын үсэг зурав. Эдийн засгийн хөгжлийн сайд Н.Батбаяр, Зам тээврийн сайд А.Гансүх, Эрчим хүчний сайд М.Сономпил болон Нийслэлийн засаг дарга Э.Бат-Үүл нар гэрээг үзэглэсэн юм. Мөн Хөгжлийн банкны тэргүүн дэд захирал С.Сандагдорж, Нийслэлийн орлогч дарга Н.Гантөмөр нар цаашдын бүтээн байгуулалтын гэрч болон оролцжээ. Улаанбаатар хотод өрнөөд буй зам барилгын ажил, инженер шугам сүлжээний шинэчлэл, засварын ажлууд дээрх гэрээний хүрээнд явагдана. Мөн бүх аймгийн төвийг нийслэлтэй холбох мөрийн хөтөлбөрийг шат дараалан хийх ажлын гараа болгож 2013 онд зургаан аймгийн төвийн замын ажил дээрх санхүүжилтээр хэрэгжих юм.
