“Онлайн парламент”-ын төлөөлөгчид сар гаруйн дараа болох Ардын хувьсгалын 92 жилийн ойн баяр наадмыг тэмдэглэх зардал урьдчилсан байдлаар урьд онуудынхаас даруй 50 дахин их төсөвлөгдсөнд шүүмжлэлтэй хандаж буйгаа мэдэгдлээ. Учир нь, бүтээн байгуулалтын олон ажил хийхээр төлөвлөсөн ч баяр наадмын найр цэнгээн, урлаг соёлын арга хэмжээ, урсгал зардалд 3.8 тэрбум төгрөг зарцуулах нь өнгөрсөн жилүүдтэй харьцуулахад хэтэрхий их гэнэ.
Иймээс тус парламентын төлөөллийн зүгээс Монгол Улсын Засгийн газарт зардлын задаргаагаа олон нийтэд ил нээлттэй болгохыг шаардав. Жишээ нь, Соёл урлагийн салбар хороо энэ жил 969.6 сая төгрөг төлөвлөжээ. Гэтэл 2012 оны наадмаар тус салбар хороо 82,2 сая төгрөгт багтаан үйл ажиллагаагаа зохион байгуулсан аж.
Энэ жилийн наадмын үйл ажиллагаа ямар нэгэн ойтой давхцаагүй атлаа төсөв нэмэгдсэн шалтгаан нь юу болох тухай, үүнд төсөвлөсөн төсвөөсөө нийгэмд хэрэгцээтэй сургууль, цэцэрлэг, эмнэлэг баривал ард түмэнд тустай үйл болно хэмээн үзжээ.