- Санхүүгийн зохицуулах хороо болон “БИ ДИ СЕК”  компанийн хууль бус үйл ажиллагаа, дарамтаас болж хүний амь нас үрэгдсэн гэх мэдээлэл ирсэн юм. Энэ талаар тодруулахгүй юу?
-Үнэхээр харамсалтай зүйл болоод байна. Манай “Силикат” компанийн ТУЗ-ын дарга Д.Туул эгч минь ид хийх бүтээх насан дээрээ харамсалтайгаар амь насаа алдаж, бидэнд нөхөж баршгүй их гарз тохиолоо. Талийгаач маань энэ сарын 17-нд бурхан болсон. Жил гаруйн өмнөөс  маш хүнд өвчинд нэрвэгдсэн байдаг юм. Хүнд өвчин тусах болсон шалтгаан нь  сэтгэл санааны хүнд дарамтаас үүдэлтэй гэдгийг эмч мэргэжилтнүүд удаадараа хэлж байсан. Өөрөөр хэлбэл төрийн байгууллага болох Санхүүгийн зохицуулах хороо,  брокер дилерийн  зуучлалын компанийн хууль бус үйлдлүүд, тэдний хүнд дарамт шахалтаас үүдэлтэй юм. Төрийн байгууллага, хувийн компани хоёрын хамтарсан шахалт, дарамт, хууль бус үйл ажиллагаанаас болж хүний амь үрэгдсэнд үнэхээр их харамсч байна. Дээрх хоёр газрыг миний бие илт гүтгээд байгаа юм биш. Үүнийг баримттайгаар хэлж болно. Монголын нийт ард түмэнд  Санхүүгийн зохицуулах хороо болон “БИ ДИ СЕК” компанийн хууль бус хүний мөс чанараа алдсан чанарыг дэлгэрэнгүйгээр хүргэх гэсэн юм.
-“Силикат” компанийн ТУЗ-ын дарга Д.Туул Улсын мөрдөн байцаах газарт  гомдол гаргахаар зэхэж байсан гэсэн?

-Тиймээ. УМБГ-ын Эдийн засгийн гэмт хэрэгтэй тэмцэх хэлтэст өргөдөл өгөх гээд биччихсэн байсан юм. Даанч өргөдлөө өгч амжсанүй. Д.Туул дарга өргөдөлдөө  Мэргэжлийн зуучлагч байгууллага гэгдэх “БИ ДИ СЕК” компани гэрээ байгуулж ажиллаж ирсэн цагаас төрийн байгууллагатай хуйвалдан, хууль тогтоомжийг илтэд  санаатайгаар  зөрчин манай компанийн эрхийг хууль бус аргаар авах гэж цаг үргэлж оролдон, биднийгсэтгэл санааны хүнд дарамтад оруулж ирсэн. Үүнээс болж миний бие илтэд доройтон өвдөж, зовж байна. Өнөөдөр би хэвтрийн байдалд орж маш хүнд байдалтай болоод байгаа бөгөөд үүнийгСанхүүгийн зохицуулах хорооны дарга Баярсайхан болоод  “БИ ДИ СЕК” компанийн захирал Д.Даянбилгүүн нартай шууд холбоотой гэж үзэж байна. Иймд эдгээр эрх бүхий хүмүүсээс сэтгэл санааны  болон өөрийн эмчилгээний зардал болох таван зуун сая төгрөг нэхэмжилж байна. Хэрэв миний амь нас үрэгдвэл нэр бүхий этгээдүүдээс гурван тэрбум төгрөг нэхэмжлэх болно хэмээн бичсэн өргөдөл байгаа.  Мөн бурхан болохоос өмнө Д.Туул дарга нэгэн сэтгүүлчид ярилцлага өгсөн байсан юм. Тэрбээр сэтгүүлчид өгсөн ярилцлагаа ч хэвлэгдэж амжаагүй байхад бурхан болчихсон. Иймд бидСанхүүгийн зохицуулах хороо болон “БИ ДИ СЕК” компанийн хуулийг уландаа гишгэж дураараа авирлаж байсныг баримттайгаар ярьсан ярилцлагыг ньхүргэхньхамгаас чухалюм.

Д.Туул: Бидний хөлс, хөдөлмөрөө шингээсэн бүхнийг бичиг, цаасны аргаар булаахыг оролдож байна

-Санхүүгийн зохицуулах хороо хууль бус тогтоол үйлдэж, “Силикат” компанийн санхүүгийн үйл ажиллагаанд багагүй хохирол учруулсан тухай мэдээлэл сонин хэвлэлээр гарч байна.  Энэ талаар тодорхой хариулт өгнө үү?
-Бүр эхнээс нь тайлбарлах хэрэгтэй байх. “Силикат” хувьцаат компанийн удирдлагаас 2008 онд шохойн үйлдвэрлэлийн хүчин чадлыг нэмэгдүүлэх зорилгоор төсөл боловсруулж, судалгаа тооцоо хийж, үүнд хоёр тэрбум төгрөг шаардлагатай гэсэн тооцоо гарсан. Ингээд Европын хөгжлийн банкнаас “Зоос” банкаар дамжуулан хоёр тэрбум төгрөгийн зээл авахаар болж, шугамын зээл нээлгэсэн. 2008 оны гурав, дөрөвдүгээр сард зээлийн шугамаас 700 сая төгрөг авч хөрөнгө оруулалт хийж байтал “Зоос” банкны үйл ажиллагаа доголдож эхэлсэн. Зээлийн шугамаас нэмж 200 сая төгрөг олгоод тус банк зээл олголтыг зогсоосон. Ингэснээр бидний эхлүүлсэн хөрөнгө оруулалтын ажлууд талаар болж зээл, зээлийн хүү, нэмэгдүүлсэн хүүгийн дарамтад орох бэрхшээл тулгарсан. Хоёр тэрбумыг багцаар нь авч байж үр ашиг нь гарах ёстой учраас зээлийн гэрээний үүргээ биелүүлж үлдсэн 1.1 тэрбум төгрөгөө үргэлжлүүлэн олгохыг Европын Хөгжлийн банк болон “Зоос” банкны удирдлагуудаас удаа дараа хүссэн.
-Ямар учраас үлдэгдэл зээлийг танайд олгоогүй юм бэ?
-“Зоос” банк 2009 оны арваннэгдүгээр сарын 20-нд дампуурч тус банкинд бүрэн эрхт төлөөлөгч томилогдсоноор бидний хүсэлт хэрэгжих бололцоогүй боллоо гэж бид ойлгосон. Санхүүгийн байдал хүндэрсэн 2010 оны гуравдугаар сард манай Улаанбаатар хотын салбар хариуцсан ажилтан “Үнэт цаасны зуучлалын үйл ажиллагаа эрхлэгч андеррайтерийн компанитай хамтран “Силикат” компанийн хувьцааны тодорхой хувийг Хөрөнгийн бирж дээр арилжиж, орлогоосоо өрөө төлж, бүтээн байгуулалтын ажлаа үргэлжлүүлэх боломж байгааг бидэнд хэлж, “Миний  саналыг хүлээн авч дэмжээч, ингэж санхүүгийн хүндрэлтэй байдлаасаа түргэн гаръя” гэсэн. Санхүүгийн байдал төдийлэн сайнгүй байсан ч дээрх саналыг компанийн удирдлага зөвшөөрч өөрсдийн өмчлөлийн хувьцааны 30 гаруй хувийг хөрөнгийн зах зээлд гарган арилжаалж шаардлагатай мөнгөн хөрөнгийг татан төвлөрүүлэхээр шийдвэрлэсэн. Ингээд “Силикат” компанийн нэмэлт хувьцааг бэлтгэн гаргуулахаар 2010 оны дөрөвдүгээр сард зуучлагч компанитай “Андеррайтерийн гэрээ” байгуулан, тэдний шаардсан бүх мэдээллийг цаг тухайд нь гаргаж өгч байсан. Гэтэл 2010 оны долдугаар сард”Зоос” банкны бүрэн эрхт төлөөлөгч Дархан-Уул аймгийн сум дундын шүүхэд нэхэмжлэл гаргаж,”Силикат“компаниас “Зээл, зээлийн хүү, нэмэгдүүлсэн хүүгийн төлбөр нийт 1.8 тэрбум төгрөгийг гаргуулах, барьцааны хөрөнгөөр үүргийн гүйцэтгэлийг хангуулах”-аар  шүүхэд шилжүүлсэн.
-Та  нар бол “Зоос” банкны үйл ажиллагаа зогссон гэж үзэж байсан биз дээ. Тэгээд шүүх ямар шийдвэр гаргасан бэ?
-2010 ны наймдугаар сарын 9-ний өдөр шүүхээс 3539 тоот захирамжаар “Силикат” компанийн эд хөрөнгө болон 170126 ширхэг энгийн хувьцааг битүүмжлэх шийдвэр гаргаж, ШШГЕГ-ын 38 дугаар тойргийн шийдвэр гүйцэтгэлийн албанд даалгасан. Үүний дагуу есдүгээр сарын 13-ний өдөр шийдвэр гүйцэтгэгч Н.Бадамханд “Эд хөрөнгө битүүмжлэх 38 дугаар акт үйлдэн “Силикат” компанийн эд хөрөнгө болон 170126 ширхэг энгийн хувьцааг битүүмжилсэн.
-Хэдий хугацаагаар битүүмжилсэн бэ. Энэ үеэс зуучлагч компанийн үнэн царай илэрч эхэлсэн үү?
-Шүүхийн шийдвэрийн дагуу манай компанийн хөдлөх, үл хөдлөх хөрөнгүүд болон 170126 ширхэг энгийн хувьцааг 2010 оны наймдугаар сарын 9-нөөс 2011 оны тавдугаар сарын 9-нийг хүртэл битүүмжилсэн. Манай компани хугацаа хэтэрсэн өрийн асуудлаар шүүхэд шилжих болсон талаарх мэдээллийг зуучлагч компанийнханд мэдэгдэх гэтэл хариуцаж байсан ажилтан нь гэнэт ээлжийн амралтаа авснаар, тухайн ажлыг хариуцах эзэнгүй болсон байсан.  
–Хэн нэгэн ажлыг нь орлох ёстой биш үү?
-2010 оны аравдугаар сард бид зуучлагч компанийнхантай холбогдон”Силикат” компани хугацаа хэтэрсэн өрийн асуудлаар шүүхэд шилжсэн тул андеррайтерийн гэрээг цуцлах шаардлагайтайг мэдэгдсэн. Гэтэл гэрээ үл буцах нөхцөлтэй байгуулагдсан тул гэрээг цуцлах боломжгүй гээд 2010 оны аравдугаар сарын 11-нд андеррайтерийн гэрээний үл буцах нөхцөлийг өөрчилж андеррайтерийн гэрээг шинээр байгуулахаар болсон. Бид өөрсдийн талаас “Хуульч, үнэт цаасаар мэргэшсэн зөвлөх оролцуулъя” гэтэл зуучлагч компани “Бид зуучлалын үйл ажиллагааг хуулийн дагуу явуулж, та бүгдийг шаардлагатай мэдээллээр хангана. Зуучлалын үйл ажиллагаа нь компанийн нууцад хамаарах асуудал тул хуульч болон үнэт цаасны зөвлөх ажиллуулахгүй гэсэн.   
-Хувь нийлүүлэгчдийн хурлыг хуралдуулсан нь ямар учиртай юм бол?
-2011 оны дөрөвдүгээр сарын 29-нд зуучлагч компаниас “Хувь нийлүүлэгчдийн хурлыг яаралтай хуралдуулж, хурлын материалыг, “Нэмэлт хувьцаа гаргах зөвшөөрөл хүссэн хүсэлт”-ийн хамт яаралтай ирүүл гэсний дагуу тавдугаар сарын 1-ний өдөр хуралдуулж, хурлын материалыг “Нэмэлт хувьцаа гаргах зөвшөөрөл хүссэн хүсэлт”-ийн хамт 2-ний өдөр хүргүүлсэн. Гэтэл 4-нд хорооны хурал болжтүүнээс хоёр хоногийн дараа Хорооноос “Силикат” компанийн нэмэлт хувьцааны арилжааг Хөрөнгийн бирж дээр арилжих зөвшөөрлийг зуучлагч компанид олгосон 130 дугаар тогтоол гарсан байсан . Улмаар Хөрөнгийн биржээс зургадугаар сарын 28-нд СЗХороонд 1/388 дугаар бүхий “Тайлбар хүсэх тухай” албан тоот хүргүүлж, хувийг манай компанид ирүүлсэн. Түүнд “Бид холбогдох дүрэм, журмын дагуу уг компанийн үнэт цаасыг МХБ-ийн үнэт цаасны жагсаалтад бүртгэх эсэх асуудлаар шалгалт хийж байна. Бүртгэл, шалгалтын асуудлаар дараах зарим тодорхойгүй асуудал гараад байна. Үүнд, СЗХорооны “Нийтэд санал болгон худалдах үнэт цаасыг бүртгэх, үнэт цаасыг анхдагч зах зээлд санал болгох, худалдах тухай журам”-ын дагуу нэмж хувьцаа гаргах компанийн хангавал зохих шаардлагуудаас журмын 2.5.1-р заалт буюу “Хугацаа хэтэрсэн өргүй байх”, 2.5.3-р заалт буюу “Хороо болон Хөрөнгийн бирж компанийн засаглалыг хангалттай гэж үнэлсэн ...” гэсэн шаардлагуудыг бүрэн хангаагүй байхад Хорооноос “Силикат” компанид олон нийтэд санал болгон нэмж хувьцаа гаргах зөвшөөрөл олгожээ. Түүнчлэн “Нэмж үнэт цаас гаргах”, “Үнэт цаасыг хөрвүүлэх” тухай асуудлыг хэлэлцэн шийдвэрлэсэн тус компанийн 2011 оны тавдугаар сарын 1-ний өдрийн ХНХурал нь зохих хууль, журмын дагуу хийгдсэн эсэх нь эргэлзээтэй байгаа тул энэ талаар нягтлан тайлбар яаралтай ирүүлэхийг хүсье” гэсэн байсан. Бид Хувь нийлүүлэгчдийн хурлаа дахин хуралдуулж, хуульд нийцүүлэх эсэх талаар зуучлагч компаниас тодруулахад “Дахин хуралдуулах шаардлагагүй, энэ асуудлыг удахгүй шийднэ” гэсэн хариу өгсөн.
-Энэ нь ямар учиртай юм бол. Асуудлыг тэд хэрхэн шийдсэн бэ?
-Хэсэг хугацааны дараа буюу улс төрийн хэллэгээр бол унтуулж байгаад 2011 оны наймдугаар сарын 9-нд”Силикат” компанийн нэмэлт хувьцааны арилжаа Хөрөнгийн бирж дээр явагдаж, хувьцааны арилжаанаас 3.6 тэрбум төгрөг татан төвлөрүүлсэн. Улмаар “Силикат” компанийн хувь нийлүүлэгчдийн хурлыг есдүгээр сарын13-нд хуралдуулахаар товлосон. Гэтэл есдүгээр сарын 3-нд манай компанийн удирдлагуудтай зуучлагч талаас хоёр залуу ирж уулзахдаа “Силикат” компанийн ТУЗ-ын есөн гишүүний зургаад нь манай хүмүүс байх болно, хяналтын зөвлөлийн гурван гишүүнийг манайх авах болно” гэж мэдэгдээд ТУЗ, Хяналтын Зөвлөлд орох хүмүүсийн нэрсийг манай компанийн удирдлагад өгсөн. Бидний мэдэлд компанийн хяналтын багц буюу нийт хувьцааны 65 хувь байгаа талаар сануулахад “Хяналтын гэж багц байхгүй болсон, танай эзэмшлийн 65 хувийн хувьцааны 34 хувь нь саналын эрхгүй, үлдэх 31 хувь нь саналын эрхтэй байгаа, бидний саналыг эс зөвшөөрвөл “Тендер санал зарла” гэж тулгасан байдаг.        
–Зуучлагч компанид ийм эрх байхгүй биз дээ?  
-Бид энэ асуудлыг нягталж үзэхээр үнэт цаасны мэргэшсэн шинжээчид хандсан. Тэр хүн манай материалыг судлаж үзээд “... та бүгд 2005 онд тендерийн санал зарлажээ. Тендер санал зарласан хугацаа 60 хоног үргэлжилжээ. Гэтэл түүнээс хойш гурван жилийн дараа 2008, 2011 онд танай хувьцаа хоёр удаа хөдөлгөөнд орж, шинэ хувьцаа эзэмшигчидтэй болсон байна. Зуучлагч компани зуучлалын үйл ажиллагаа явуулж байхдаа “Танай шинэ хувьцаа эзэмшигчдийг “тендер санал зарлуулж, нэгдмэл сонирхолтойэтгээд болгуулах” ёстой байсан. Гэтэл энэ үүргээ биелүүлээгүй байна. Иймээс та бүхний эзэмшиж байгаа 65 хувийн хувьцааны 34 хувь нь саналын эрхгүй, хувь нийлүүлэгчдийн хуралд оролцож, компанийн удирдлыг сонгох эрхгүй болжээ. Түүнээс гадна танай 2010 оны аравдугаар сарын 11-нд хийсэн зуучлалын гэрээнд “ТУЗ-ын бүрэлдэхүүн, Гүйцэтгэх удирдлага болон хөрөнгийн бүтцийг бүхэлд нь өөрчлөх” ...арилжаа явагдсны дараа компанийн удирдлага, эрх мэдлийг нөгөө талд шууд шилжүүлэх агуулга бүхий заалтыг хавсралт № 2-оор оруулсан байна. Зуучлагчийн эрх мэдэл бүхий ажилтан нь танай хувьцаа хариуцсан ажилтантай /анх, хөрөнгийн бирж дээр хувьцааны тодорхой хувийг арилжаалан шаардлагатай хөрөнгө босгож, өр болон бүтээн байгуулалтын ажлаа үргэлжлүүлэх саналыг гарган биднээр зөвшөөрүүлсэн УБ хотын салбар хариуцсан манай ажилтан/ урьдчилан тохиролцож, гэрээний хавсралт үйлдэн хоёр тал гарын үсэг зурж баталгаажуулсан талаарх маш ноцтой хууль бус баримт андеррайтерийн гэрээнд байна” гээд “Энэ баримтаар бол анхнаасаа хөрөнгө оруулалт нэрээр танай компанийг булаан авах зорилготой, урьдаас төлөвлөж ийм нөхцөл бүрдүүлсэн нь харагдаж байна. 2011 оны есдүгээр сарын 13-нд хувь нийлүүлэгчдийн хурал болбол ТУЗ-ын бүрэлдэхүүн, Хяналтын зөвлөл, Гүйцэтгэх удирдлага болон хөрөнгийн бүтэц шууд өөрчлөгдөж, компанийн удирдлага нөгөө талд шилжих нөхцөл бүрэн бүрджээ” гэдгийг хэлсэн.
–Та нарын хэчнээн жил зовж байж босгосон үйлдвэр, хөрөнгийг цаас цуглуулж байгаад булааж авах гэсэн хүмүүсийг шүүхэд өгөх ёстой байсан биш үү?
-Үүссэн нөхцөл байдал нь компанийн 65 хувийн хувьцаа эзэмшигчдийн дотор зөрчилдөөн бий болгож, 2011 оны зургадугаар сарын 28-ний өдрийн МХБиржээс ирүүлсэн “Тайлбар хүсэх тухай” 1/388 тоотод дурдсан асуудлыг дахин хөндөхөд хүргэсэн. Улмаар нэр бүхий хувьцаа эзэмшигчид тавдугаар сарын 1-ний өдөр хуралдсан компанийн хувь нийлүүлэгчдийн хурал нь хуульд заасан журмын дагуу хуралдсан эсэхийг тогтоолгохоор Дархан-Уул аймгийн сум дундын шүүхэд нэхэмжлэл гаргасан. Шүүх уг нэхэмжлэлийг 2011 оны есдүгээр сарын 29-нд хянан шийдвэрлэж, шүүхийн 1334 дугаар шийдвэрээр “Силикат” ХК-ийн Хувь Нийлүүлэгчдийн 2011 оны тавдугаар сарын 1-ний хурлын “Хувьцаа хуваах тухай” 01 дугаар тогтоол, “Нэмэлт хувьцаа гаргах тухай” 02 дугаар тогтоол, “Зах зээлд үнэ тогтоох тухай” 03 дугаар тогтоолыг тус тус хүчингүй болгож, “Силикат” компанийн хувь нийлүүлэгчдийн 2011 оны тавдугаар сарын 1-ний өдрийн хурлын үйл ажиллагаа хууль бус болох хэмээн шийдвэрлэсэн. Шүүхийн 1334 дүгээр шийдвэр гарсан цагаас компанийн ТУЗ-ийн дарга, Гүйцэтгэх захирал болон нэр бүхий хувьцаа эзэмшигчид СЗХороонд хандан 130 болон 241 дүгээр тогтоолыг хүчингүй болгуулахаар удаа дараа өргөдөл, хүсэлт, гомдол гаргасан. Гэтэл СЗХороо “130 дугаар тогтоолыг хүчингүй болгох хууль зүйн үндэслэлгүй” гэсэн хариу ирүүлсэн. Тус хорооны дэргэдэх Хяналтын зөвлөлд 2011 оны арванхоёрдугаар сард нэр бүхий хувьцаа эзэмшигчид 130 дугаар тогтоолыг хүчингүй болгуулахаар хүсэлт гаргахад “Нэр бүхий хувьцаа эзэмшигчдээс гаргасан хүсэлтэд дурдсан зүйлийг холбогдох нотлох баримтад тулгуурлан шалгаад 2012 оны нэгдүгээр сард багтаан хариу ирүүлэхийг Хороонд үүрэг болгов” гэсэн албан тоотыг СЗХороонд өгч нэг хувийг нь бидэнд ирүүлсэн. Гэтэл бас унтуулах арга хэрэглэж байгаад 2012 оны гуравдугаар сарын 23–нд Хорооны дэргэдэх Хяналтын зөвлөлөөс “Гомдлыг хэрэгсэхгүй болгож, Хорооны шийдвэрийг хэвээр үлдээсүгэй” гэсэн тогтоол гаргуулж бидэнд хүргүүлсэн.
–Санхүүгийн зохицуулах хороо ийм маргааныг зохицуулахын тулд ажилладаг төрийн байгуулага биз дээ. Гэтэл яагаад та нарт “хойд эх”-ийн царай харуулаад байгаа юм бол?
-Хорооны дарга бидэнтэй удаа дараа уулзахдаа “Та нар ХНХурлаа хий, хоорондоо учраа ололцоод, цааш яв” гэсэн шаардлага тавьдаг. Бид хариуд нь “Тэгвэл, та 65 хувийн хувьцаа эзэмшигчид нэгдмэл сонирхолтой этгээд мөн гэсэн баталгаажуулсан бичиг хийж өгнө үү” гэхэд “Та нар эхлээд ХНХурлаа хийчих” гэж дахин дахин шаардаж байсан. Дахин уулзахдаа “Бид зуучлагч компанийнхантай уулзлаа, хүчингүй болгох аргуудыг тэд санал болгож байна, “ХНХурлаа хийгээд 130, 241 тоот тогтоолыг хүчингүй болгох шийдвэрээ гаргачих, тэр шийдвэрээ Хороонд ирүүлчих, бид тогтоолоо хүчингүй болгоод өгье” гэх. Хамгийн сүүлд уулзахад “Хорооны 130, 141 дугаар тогтолыг хүчингүй болгоё, эхлээд та нар хувьцааны арилжаанаас татан төвлөрүүлсэн бүх мөнгөө үнэт цаасны хадгаламжийн төв рүү шилжүүлчих, тэгвэл тогтоолыг хүчингүй болгоё” гэсэн.
-СЗХорооны дарга зуучлагч компанийн зуучлалын үйл ажиллагаа хууль журмын дагуу явагдсан эсэхийг шалгаж, илэрсэн зөрчлийг арилгахын оронд яагаад зуучлагчдын үгийг дамжуулаад байдаг юм бэ?               
 -Уг нь бол зуучлагч компанийнхны амаар ажиллаж болохгүй. Гэвч СЗХ-ны дарга, ажилтнууд энэ мэтчилэн хууль бус үйлдэл хийсээр төрийн өмнө хүлээсэн үүргээ биелүүлэхгүй өдий хүрлээ. Нэр бүхий хувьцаа эзэмшигчид Хорооны 130, 241 тоот захиргааны акт нь илт хууль бус болохыг тогтоолгохоор Нийслэлийн захиргааны хэргийн анхан шатны шүүхэд нэхэмжлэл гаргаж, эрхээ хамгаалуулахаар өмгөөлөгч хөлсөлсөн. Гэтэл  өмгөөлөгч нь бидэнд урьдчилан мэдэгдэлгүйгээр шүүх хурал дээр нэхэмжлэлийн шаардлагыг “хүчингүй болгуулах” гэж өөрчилсөн. Шүүгч өмгөөлөгчийн саналыг хүлээн авч, “Силикат” компани хугацаа хэтэрсэн өргүй, СЗХороо хууль зөрчөөгүй байна гэж үзээд, Хорооны 241 тоот тогтоолыг хүчингүй болгож, 130 тоот тогтоолыг хэвээр үлдээж эсрэг талд шийдвэр гаргасан. Гэтэл “Силикат” компанитай холбогдуулан Дархан-Уул аймгийн шүүхээс гаргасан шүүгчийн 900 дугаар захирамж, эд хөрөнгө битүүмжлэх тухай 38 дугаар акт нь нэмэлт хувьцааны танилцуулга бэлдэн гаргах үед хүчин төгөлдөр байсан. Түүнчлэн компанийн ХНХуралтай холбогдуулан гарсан шүүхийн 1334 дугаар шийдвэр  өнөөдрийг хүртэл хуулийн дагуу хүчин төгөлдөр байсаар байхад  Захиргааны хэргийн шүүх манай гаргасан нэхэмжлэлийг хянан шийдвэрлэхдээ шүүхийн хүчинтэй байгаа дээрх шийдвэрүүдийг огт харгалзан үзэлгүй шийдвэрээ гаргалаа. СЗХороо нь мэргэжлийн зуучлагч компани зуучлалын үйл ажиллагаа явуулахдаа Монгол Улсын хууль, тогтоомжийн олон заалтыг зөрчин, хууль бус үйл ажиллагаа явуулсаар байгааг мэдсээр байж  хууль бус үйлдлийг нь хөхиүлэн дэмжиж, найр тавьсаар өнөөдрийг хүргэж байгаад гайхаж байна.
-Та нар маш их зориг, тэвчээр, хөдөлмөр гаргаж энэ үйлдвэрийг хөл дээр нь босгосныг мэдэх хүн олон. Гэтэл дуртай нэг нь ирээд булаахыг оролдож байгаа нь инээдтэй хэрэг шүү дээ. Та нар одоо ямар арга хэмжээ авч байна вэ?
-Монгол Улс зах зээлийн нийгэмд шилжсэн шилжилтийн үед эх орны хэдэн арван үйлдвэр, аж ахуйн газрууд зах зээлийн шуурганд өртөн зогсож, дампуурч устаж үгүй болсон түүхтэй. Үүний жишгээр одоогийн манай үйлдвэр үүд хаалгаа барин үйл ажиллагаа нь бүрэн зогссон байсан. Бид үйл ажиллагаа нь зогсоод олон жил болсон цагаан тоосгоны үйлдвэрийг өөрсдийн уйгагүй хөдөлмөр, өөрсдөдөө байгаа бүхий л хөрөнгө, бололцоогоо дайчлан барилгын материал үйлдвэрлэлийн үндэсний томоохон үйлдвэрлэгч, өнөөдрийн” Силикат” компанийг бий болгож чадсан. Гэтэл нэг ч эрэг, боолт чангалж үзээгүй хүмүүс бидний бүтээсэн юмыг булаах гээд байгааг ойлгохгүй байна. Бүр байгуулагдах үеэс хамтран ажиллаж байсан, итгэлт хүмүүс маань атгаг санаа агуулж, хууль бус зүйл олныг хийсэнд гайхаад барахгүй байна. Бид одоо 100 гаруй хүнийг байнгын ажлын байраар хангаж, улсад шууд болон шууд бусаар хоёр тэрбум орчим төгрөгийн татвар төлөөд байна. Гэтэл тэд энэ их хөдөлмөрийг маань зүгээр л бичиг, цаасны аргаар булаахыг оролдож байгааг бид хүлээн зөвшөөрөхгүй. Өөрсдийнхөө гараар бүтээж, босгосон ширхэг тоосго бүрээ хамгаалахын тулд хийж чадах бүхнээ хийнэ. Үүний дээр Шинэчлэлийн Засгийн газар шударга бүхний талд байж, худал үнэнийг ялгахад бодлогоор бодитой дэмжлэг үзүүлж байгаад баярлаж байна. Мөн хууль хяналтын байгууллагынхан үнэн, мөнийг олж, зөв шийдвэр гаргана гэдэгт итгэлтэй байна.