Дэлхийн сэргээшийн эсрэг агентлагийн гүйцэтгэх хороо буюу “WADA” нь олныг гайшруулсан шийдвэр гаргажээ. Мариухан буюу манайхны хар ярианд “өвс” гэгддэг хар тамхины цусан дахь зөвшөөрөгдсөн хэмжээг арав дахин нэмэгдүүлсэн болохоор олон нийт ийнхүү гайхсан байна. Арав дахин гэхээр хүн төсөөлөхгүй байж болох. Тэгэхээр мэргэжилтнүүдийн гаргасан жишгийг сонирхуулъя.
Шинэ дүрмийн дагуу тамирчид тэмцээнээс хасагдана гэж айлтгүйгээр тэмцээний өмнөх өдөр ч хамаагүй мариухан татах боломжтой болж байгаа аж. Энэ хууль үйлчлээд эхэлчихсэн. Хэдхэн жилийн өмнө усанд сэлэлтийн од Майкл Фелпс үдэшлэг дээр мариухан татахад зориулагдсан хэрэгсэлтэй  гарсан зураг спортын ертөнцөд асар их дуулиан тарьсан. Ийм алдартай одыг хар тамхины төрлийн ургамал татаж байгааг фэнүүдээс нь эхлээд Засгийн газрын түшмэд хүртэл олон хүн шүүмжилсэнд Фелпс аргагүйн эрхэнд олны өмнө уучлал гуйж байсан билээ. Тэгвэл “WADA”-ийн шинэ дүрмээр бол тэмцээнд орохын өмнө бассейны гараан дээр шахуу зогсч байгаад мариухан татсан ч болох болжээ.