-Юун түрүүнд танд Ази тивийн болон олон улсын жүдо бөхийн холбооны чансаа өндөртэй “Их дуулга” тэмцээнд түрүүлсэнд баяр хүргэе?
-Баярлалаа. Ази тивийн аварга шалгаруулах тэмцээнд хүссэн амжилтаа үзүүллээ. Мөн өнгөрсөн амралтын өдрүүдэд болсон “Их дуулга” тэмцээнд анх удаагаа түрүүллээ. Өмнөх жилүүдэд эл тэмцээнээс мөнгө, хүрэл медаль хүртэж байсан.

-“Их дуулга”-ын өмнө 1130 оноогоор 66 кг-ын жинд гуравдугаарт бичигдэж байсан бол өнөөдрийн байдлаар тив тивийн жүдочдын тэргүүнд эрэмблэгдэж байна?
-Тийм ээ. Миний амжилт яг одооноос л эхэлж байна. Цаашдаа олон тэмцээн уралдаан хүлээж байна. Бэлтгэл сургуулилтаа эрчимтэй базааж чансаагаар тэргүүлэгчдийн эгнээг алдахгүйг хичээнэ ээ.

-“Их дуулга” тэмцээний аваргын төлөө нутгийн бөх Нижат Шихализадаг ердөө нэг минут 31 секундэд цэвэр дарсан нь бөх сонирхогчдын анхаарлыг ихэд татсан. Ер нь, тойргийн дөрвөн барилдаан хэр өрсөлдөөнтэй байв?
-Дөрвөн тойрог барилдахад өрсөлдөгч бөхчүүд үнэхээр хүчтэй байсан. Сүүлийн аваргын төлөө барилддаг эзэн орны жүдоч дэлхийн аварга шалгаруулах тэмцээний хүрэл медальтай, 66 кг-д хүчтэй өрсөлдөгчийн тоонд зүй ёсоор нэрлэгддэг. Ялж аварга болсондоо баяртай байгаа.

-Лондонгийн олимпын дараагаас буюу өнгөрсөн есдүгээр сараас эхлэн 66 кг-д барилдах болсон. Миний мэдэхээр долоон тэмцээнд финалдана гэдэг бахдам амжилт?
-Тийм ээ. Дөрөвт нь алтан медаль зүүж, гуравт нь мөнгөн медаль хүртлээ.