Жирийн л нэг тээврийн жолоочоос сайхан амьдралыг босгож, ёстой л хүний дайтай яваа хүн бол Монгол Улсын Манлай заан Донровын Долгорсүрэн юм. Түүний гэр бүлийн хүн нь Х.Пүрэвбадам. Архангай аймгийн Өлзийт сумын харьяат бөхийн удамтай нэгэн. Тиймдээ тэд олон сайхан хүүхэд төрүүлж, өсгөснийхөө үр шимийг хүртэж жаргаж яваа буурлууд юм. Хамгийн том хүү нь Д.Сугаррагчаа залуудаа шаггүй барилдаж явсан нэгэн бол удаахь хүү нь Монгол Улсын аварга Д.Сумъябазар. Аавынхаа аваагүй цолыг авсан эгэлгүй хүчтэн. Тэрний дараах нь Улсын начин Д.Сэржбүдээ. АСА группын захирлын албан тушаалыг хашч, ах дүүсийнхээ бизнесийг ахиулж яваа бизнесмен. Харин бидний хайрт их аварга Д.Дагвадорж. Түүнийг гэр бүлийнхээ бизнесийн үндэс суурийг тавьсан гэж ярьдаг. Чадаж байгаа юманд арга байхгүй гэгчээр Дагваа аварга чадсан. Харийн оронд өөрийн чадлаараа тодорч гарсан аавын хүү.
Харин Д.Долгорсүрэн гуайнх ганц охинтой. Түүнийг Д.Ичинноров гэдэг. Эрдмийн мөр хөөсөн бүсгүй Япон, АНУ-д сургууль дүүргэжээ.
Бөхийн босоо цагаан хийморь энэ л гэр бүлийг ивээсэн. Д.Долгорсүрэн гуай тээвэрт явж ирээд л улсын наадамд зодоглож, бөхийн хүмүүжлээр л хүн болсон гэдэг. Түүний хүүхдүүд нь ч мөн л ялгаагүй бөхөөр хүмүүжсэн. Ингээд бодохоор бөхгүйгээр энэ гэр бүлийг төсөөлөх аргагүй юм. Бичил бөхийн сургууль гээд хэлчихэд буруудахгүй биз. Бөхийн сургуулийн төгсөгчид бүү тасраг ээ.