Үндсэн хуулийн цэц их суудлын хуралдаанаараа энэ сарын 17-нд Шадар сайд Д.Тэрбишдагва Үндсэн хууль зөрчсөн эсэх асуудлыг хэлэлцэхээр товлосон байна.
Иргэн П.Сэрсмаа Үндсэн хуулийн цэцэд хандаж, Шадар сайд Д.Тэрбишдагва Онцгой байдлын ерөнхий газрын дарга Т.Дуламдоржид хурандаа цол олгосон нь Үндсэн хуулийн 1.2, 38.2.1 дэх заалтыг зөрчсөн хэмээн үзэж мэдээлэл өгсөн юм. Өөрөөр хэлбэл, “эцэг” хуулийн “Ардчилсан, шударга ёс, эрх чөлөө, тэгш байдал үндэсний эв нэгдлийг хангах, хууль дээдлэх нь төрийн үйл ажиллагааны үндсэн зарчим мөн”, “Үндсэн хууль, бусад хуулийн биелэлтийг улс даяар зохион байгуулж хангах” гэсэн заалтыг зөрчсөн гэж үзсэн байна. Үндсэн хуулийн цэц эл мэдээллийн дагуу маргаан үүсгэж, Шадар сайд Үндсэн хууль зөрчсөн эсэх тухай асуудлаар их суудлын хуралдаан хийхээр болжээ.