УИХ-ын 26 дугаар тойрог буюу нийслэлийн Сонгинохайрхан дүүрэгт энэ сарын 14-нд дахин санал хураалт болно. Уг санал хураалтаар хууль тогтоох байгууллагын 75 дахь гишүүн үнэмлэхээ өвөртлөх юм. Харин жил орчим маргаантай байгаа УИХ-ын сонгуулийн 10 дугаар тойрог буюу өвөрхангайчуудыг төлөөлөх хоёр дахь суудал парламентад эзгүй байгаа. Маргаантай байсан уг тойрогт АН-аас нэр дэвшсэн Д.Зоригт, МАН-ын гишүүн С.Чинзориг нарын хэн нэг нь орж ирэх ёстой байв. Шүүхийн шийдвэр Д.Зоригтын талд гарсан  байна. Тиймээс С.Чинзориг Захиргааны хэргийн шүүхийн шийдвэрийг эсэргүүцэн давж заалдах болжээ. Тэрээр “Аливаа хэргийг цагдаагийн байгууллага хянаж, шалгаж нотолсны дараа шүүхийн байгууллага шийдвэр гаргах ёстой. Гэтэл цагдаагийн байгууллага зөв, бурууг нь тогтоогоогүй байхад шүүхээр хууль бус шийдвэр гаргасныг эсэргүүцэж байна” хэмээн ийн давж заалдаж буй аж.