Захиргааны хэргийн давж заалдах шатны шүүхийн 2013 оны нэгдүгээр сарын 17-ны өдрийн хуралдаанаар шийдвэрлэсэн УИХ-ын сонгуулийн 15 дугаар тойрогт нэр дэвшигч Ч.Хүрэлбаатар, Б.Чойжилсүрэн нарт УИХ-ын гишүүний түр үнэмлэх олгосныг хүчингүй болгосон СЕХ-нд даалгасан анхан шатны шүүхийн шийдвэрийг хэвээр үлдээсэн. Энэ шийдвэрийг эсэргүүцэж Б.Чойжилсүрэн, Ч.Хүрэлбаатар нарын гаргасан нэхэмжлэлийг Улсын Дээд шүүхийн хяналтын шатны захиргааны хэргийн шүүх өчигдөр хэлэлцээд УИХ-ын сонгуулийн 15 дугаар тойргийн хорооны тогтоолуудтай холбоотой асуудлыг СЕХ өөрийн бүрэн эрхийн хүрээнд шийдвэрлэсэн байна гэж үзэн нэхэмжлэлийн шаардлагыг хэрэгсэхгүй болгожээ. Ингэснээр Б.Чойжилсүрэн, Ч.Хүрэлбаатар нарын УИХ-ын гишүүн хэвээр үлдэх үү, үгүй юү гэдэг эцсийн хувь заяаг СЕХ шийдэх болж байгаа аж.
Харин Увс аймгийн Тариалан сумын Х.Баярсайхан нарын нэр бүхий 13 иргэний нэхэмжлэлийг хэлэлцэж, УИХ-ын сонгуулийн тухай хуулийн 35 дугаар зүйлд заасны дагуу тэдэнд мөнгөн урамшуулал олгох нь зүйтэй гэсэн СЕХ-ны шийдвэрийг баталгаажуулжээ. Хуулийн энэ заалтаар бол Б.Чойжилсүрэн, Ч.Хүрэлбаатар нарын бие төлөөлөгчдийн энэ хүмүүст өгсөн тус бүрийн 100 мянган төгрөгийг 10 дахин өсгөж урамшуулал олгох юм.