Кубын Ерөнхийлөгч Раул Кастро 2018 онд огцорно гэдгээ мэдэгдлээ. Өөрөөр хэлбэл одоо 81 настай Раул Кастро 86-тайдаа төрийн эрхээс буухаар төлөвлөж байгаа аж.
Тэрээр 2008 онд ах Фидель Кастрогийн халааг авч, Ерөнхийлөгчийн суудалд суусан юм.  Саяхан Кубад болсон Үндэсний ассамблейн сонгуулийн дараа Раул Кастро анх удаа дэд Ерөнхийлөгчтэй болж Мигель Диаз Канел Бермудезийг сонгосон юм. Одоо 52 настай Диаз Канелийг Раул Кастрогийн залгамжлагч, Кубын ирээдүйн удирдагч гэлцэж буй.
Раул Кастро Үндэсний ассамблейг нээж хэлсэн үгэндээ “Энэ бол миний сүүлчийн бүрэн эрхийн хугацаа. Би Ерөнхийлөгчөөр дахин сонгогдсон нь Кубад капитализмыг байгуулах гэсэн хэрэг биш, төгс төгөлдөр социализмыг байгуулан, цааш авч явах гэсэн хэрэг” хэмээн хэлсэн байна.