“Coal Mongolia-2013” нүүрсний салбарын хөрөнгө оруулагчдын гурав дахь удаагийн чуулга уулзалт “SS Convention Center”-т эхэллээ. Чуулга уулзалтад Байгаль, орчин, ногоон хөгжлийн сайд С.Оюун, Уул уурхайн сайд Д.Ганхуяг, “Монголын уул уурхайн корпораци”-ийн гүйцэтгэх захирал Г.Батцэнгэл тэргүүтэй албан тушаалтнууд оролцох юм байна. Чуулганаар 24 илтгэгч нүүрсний салбарын талаар илтгэл тавих аж. Мөн дэлхийд нүүрсний салбарын судалгаа хийдэг “Вүүд Маккензи” компанийн Ази Номхон далайн судалгааны баг, нүүрсний өртөг судлаач Эдвард Куран Хятадын нүүрсний зах зээл монголд хэрхэн нөлөөлөх вэ асуудлаар илтгэл тавих юм байна. Тэрчлэн төмөр зам, дэд бүтцийн асуудлаар Төмөр замын инженерүүдийн холбооны ерөнхийлөгч Л.Пүрэвбаатар ОХУ, БНХАУ-ын төмөр замын сүлжээ болон Монголын газар нутгаар дамжин өнгөрөх нүүрсний тээвэрлэлт болон хамтран ажиллах боломжуудын талаар ярих бол Эрчим хүчний дэд сайд Д.Доржпүрэв цаашид Засгийн газар эрчим хүчний салбарт баримтлах бодлогыг танилцуулах ажээ.
