Мубаракийг унагаад эрх чөлөө, ардчиллын замд эргэлт буцалтгүй орсон тухайгаа зарласан Египетэд байдал ээдрээтэй хэвээр байна. Лалын шашинтан бус эмэгтэйчүүдийг завхай, биеэ үнэлэгч, хүчирхийлж болно гэсэн утгатай мэдэгдэл хийсэн лалын шашны хэт явцуу үзэлт номлогчийг баривчилжээ. Абдулла Ахмад Махмуд гэдэг энэ номлогч нь өөрийн эзэмшдэг хувийн сувгаар номлол айлдахдаа Тахрир талбай дээр эсэргүүцлээ илэрхийлж байгаа эмэгтэйчүүдийн 90 хувь нь бол ичих, айхыг мэддэггүй загалмайтнууд, өөрөөр хэлбэл христийн шашинтнууд, 10 хувь нь хянах хүнгүй болсон бэлэвсэн эхнэрүүд гэв. Тэднийн жагсч эсэргүүцлээ илэрхийлж байгаа нь эмэгтэйчүүдийн эрхийг хамгаалахтай ямар ч холбоогүй, тэд яг мангастай адил бодож сэтгэдэг гээд ийм эмэгтэйчүүд өөрсдөө хүчирхийлэлд өртөхийг хүсч байгаа болохоор хүчирхийлж болно гэсэн байна. Абдулла Ахмад Махмуд нь үүнээс урд ч христийн эсрэг эрс хатуу мэдэгдэл хийдгээрээ алдартай. Өнгөрсөн жил АНУ-ын Элчин сайдын яамны өмнө болсон жагсаалын үеэр Библь судрыг урсныхаа төлөө саатуулагдаж байсан хүн юм.
