Дэлхийн тэргүүн баячуудын нэг, тэрбумтан Уоррен Баффет хүнсний аварга том компаниудын нэг “Heinz”-ийг 28 тэрбум ам.доллараар худалдан авлаа. Кетчуп, жигнэсэн шошоороо алдартай тус компанийг У.Баффетын “Berkshire Hathaway” компани худалдан авахаар гэрээ хэлцлээ байгуулжээ. Энэ тухай “Heinz” компани мэдэгдэхдээ хүнсний салбарын түүхэн дэх хамгийн том, түүхэн гэрээ хэмээн онцолсон юм. Дэлхийн тэргүүн баячуудын нэг У.Баффетын мэдэлд очихоор болсон гэдэг мэдээ тарсны дараа“Heinz” компанийн хувьцаа бараг 20 хувиар өсч, нэгж хувьцааны үнэ 72,50 ам.доллар хүрсэн байна. Худалдан авах гэж буй “Berkshire Hathaway”-гийн хувьцаа ч нэг хувиар өсч, 149,240 ам.долларт хүрчээ. Дэлхийн хүнсний салбар дахь хамгийн нэр хүндтэй брэндүүдийн нэг “Heinz” дэлхийн цуутай хөрөнгө оруулагчийн мэдэлд очсон явдал хөрөнгийн зах зээлийн хувьд аль алиндаа таатай мэдээ болж хүрсэн байна.
XIX зууны төгсгөлөөр АНУ-ын Питтсбургт үйл ажиллагаагаа явуулж эхэлсэн “Heinz” өдгөө жил бүр 650 сая шил кетчуп худалдаалдаг хүнсний хамгийн том брэндийн нэг болсон билээ.
Ойрын үед томоохон компаниуд хоорондоо нэгдэх, худалдан авах гэрээ хийх явдал цөөнгүй гарч байна. Тухайлбал, АНУ-ын агаарын тээврийн хоёр гол тоглогч болох “American Airlines” болон “US Airways” хоорондоо нэгдэх болсноо зарласан бол компьютер үйлдвэрлэлээр дэлхийд тэргүүлэгчдийн нэг “Dell”-ийг үндэслэн байгуулагч Майкл Делл нь 24 тэрбум ам.доллараар худалдан авахаар болсон юм.
