Өмнөд Солонгосын “Asiana Airlines” агаарын тээврийн компанийн үйлчлэгч бүсгүйчүүд өмд өмсөх эрхийнхээ төлөө тэмцэж, компанийн удирдлагадаа ханджээ. Тэдний энэ шаардлагыг Солонгосын хүний эрхийн комисс анхааралдаа авч, компанид нь дресс кодоо өөрчлөхийг сануулсан байна. Онгоцны үйлчлэгчид ихэнх тохиолдолд банзал өмсдөг боловч “Asiana Airlines”-аас бусад агаарын тээврийн компани үйлчлэгчдээ өмд өмсөхийг зөвшөөрдөг юм. Тус компани салбарынхаа компаниуд дундаа хувцаслах дүрэм журам нь хатуу чанд гэдгээрээ алдартай.  “Asiana Airlines” онгоцны үйлчлэгчдийнхээ хувцаслалт, үсний засалтаас эхлээд ээмэгний урт, нүдний контурыг ямар хэмжээтэй тавихыг хүртэл зааж өгдөг юм. Тэд үүнийгээ “Солонгосын дээд зэрэглэлийн гоо сайхныг” дэлхий нийтэд сурталчлах зорилготой хэмээн тайлбарладаг ч зарим тохиолдолд энэ нь хүний эрхийг зөрчиж байна гэж Хүний эрхийн комисс үзжээ.