Грекийн Афин хотын Хөдөө аж ахуйн яамны дэргэд өчигдөр хүнснээс үүдсэн эмх замбараагүй байдал үүсчээ. Газар тариалангийн татварыг нэмэгдүүлэх гэсэн Засгийн газрынхаа бодлогыг эсэргүүцсэн фермерүүд ийнхүү тарьсан ногоо жимсээ үнэгүй тарааж, эсэргүүцлээ илэрхийлж байгаа юм. Тэд нийслэл хотдоо 50 тонн жимс ногоотой ирсэн бөгөөд афинчууд эхлээд эмх замбараатай дараалалд зогсч байснаа дуусаад ирэхийн үед үлдсэн жаахан ногооноос олж авах гэж бөөн эмх замбараагүй байдал үүсгэжээ.

Зургаа дахь жилдээ эдийн засаг нь хямралтай байгаа Грекийн ард түмэн маш хүнд жилүүдийг туулж яваа юм. Гүн хямралын улмаас гадаадаас өр зээл тавин арай ядан амьдралаа залгуулж байгаа Грекийн Засгийн газар улсын төсөв мөнгөө хэмнэхийн тулд цалин, тэтгэвэр тэтгэмжийг хасч, бараг бүх төрлийн татвараа нэмэгдүүлээд байгаа билээ. Дээр нь, ажилгүйдэл бүх цагийн үеийн хамгийн дээд цэгтээ хүрчихээд байгаа учир ажилгүй, орлогогүй болсон грекчүүдэд энэ мэт үнэгүй хоол хүнсний төлөө тэмцэлдэх нь наад захын явдал болжээ.