Африкийн Гамби улс ажлын дөрөв хоногтой болсныг Ерөнхийлөгч Яхя Жамме мэдэгджээ. Өөрөөр хэлбэл, одоо Гамбигийн ард иргэд баасан, бямба, ням гэсэн долоо хоногийн сүүлчийн гурван өдөр амрахаар болж байгаа юм.
1994 онд цус урсгасан төрийн эрхэнд гарсан тэрээр элдэв сонин хачин шийдвэр гаргаж байдгаараа алдартай нэгэн. Ийнхүү ажлын амралтын өдрүүдийг уртасгасан шалтгаанаа тайлбарлахдаа хүн амын олонхийг эзлэх лалын шашинтнууддаа мөргөл хийх цаг зав олгох, олон нийттэй харилцах, нийгэмших, мөн хөдөө аж ахуйн ажилдаа санаа тавих боломж нөхцөл олгох зорилготой гэжээ. Гамби улсын 1,8 сая хүн амын ихэнх нь лалын шашинтнууд бөгөөд баасан гариг тэдний хувьд мөргөлийн өдөр байдаг аж. Гэсэн ч энэ бол ажлын өдрийг багасгах шалтгаан биш, үүнээс болоод угаас дэлхийн хамгийн ядуу орнуудын нэг Гамби эдийн засгийн хувьд илүү их хохирол амсана гэж шинжээчид шүүмжилж байна. Даваагаас пүрэв гаригт 08:00-18:00 цаг хүртэл ажиллах хөдөлмөрийн хуваарь өнөөдрөөс эхлэн хэрэгжиж байгаа аж. Энэ шийдвэр төрийн байгууллагад хүчин төгөлдөр хэрэгжих ба хувийн байгууллагууд ажиллах эсэхээ өөрсдөө шийдэх эрхтэй гэнэ.
