Тун удахгүй ерөнхийлөгчийн сонгууль, Үндсэн хуулийн бүх нийтийн санал асуулга болоход 104 сая доллар шаардлагатай Зимбабвей улсын төрийн санд ердөө 217 ам.доллар байна гэж тус улсын Сангийн сайд Тендей Бити мэдэгдлээ. Тэрээр “Өнгөрсөн долоо хоногт бид төсвийн ажиллагсдын цалинг тавьж өгөөд улсын санд ердөө 217 доллар үлдлээ” гэжээ. Түүнийхээр бол Зимбабвей улс Олон улсын хамтын нийгэмлэгт хандахгүйгээр мөнгөний гачаалаа шийдвэрлэж чадахгүй болжээ.
2008 нд болсон ерөнхийлөгчийн сонгуулиар 1980 оноос хойш эрх барьж байгаа Роберт Мугабе дахин сонгогдож сөрөг хүчний удирдагч Морган Цвангирайг ерөнхий сайдаар томилон засгийн эрхийг хамтран барьсан ч тус улсын эдийн засаг гүн хямралаас гарч чадаагүй байгаа юм.