Монгол Улсын Их хурлын тухай хуульд нэмэлт өөрчлөлт оруулах тухай хуулийн төслийг УИХ дахь АН, МАН-ын бүлгийн гишүүдээс өргөн барьсан. М.Зоригт нарын өргөн барьсан хуулийг төслийг УИХ-ын чуулганаар хэлэлцүүлж дэмжсэн бол үргэлжлүүлээд Н.Энхболд нарын өргөн барьсан хуулийн төслийг хэлэлцүүллээ. Улсын Их Хурал 2012 оны наймдугаар сарын 1-ний өдөр баталсан Монгол Улсын Их Хурлын тухай хуульд нэмэлт, өөрчлөлт орлуулах тухай хуулиар Улсын Их Хурал нь найм Байнгын хороотой байхаар заасан. Нэг Байнгын хороо нь 10-19 гишүүнтэй байхаар заасан. Тэгвэл Н.Энхболд нарын санаачилсан хуулийн төслөөр Байнгын хорооны гишүүдийн тоог  нэмэгдүүлж, 15-21 байхаар тусгасан байна.
Хуулийн төслийг баталснаар хууль тогтоох үйл ажиллагааны зохион байгуулалт, эрх зүйн орчин сайжирч, УИХ-ын үйл ажиллагаа, бүтэц, зохион байгуулалт, гишүүдийн ажиллах зарчмыг боловсронгуй болгож, хууль тогтоох үйл явц түргэн шуурхай болох гэнэ. Ингээд энэ хуулийн төслийг хэлэлцэх нь зүйтэй үзэн Төрийн байгуулалтын байнгын хороонд шилжүүлсэн юм.