Их Британийн ханхүү Харри Афганистан дахь албаа дуусгалаа гэж ИТАР-ТАСС агентлаг мэдээллээ. Хатан хааны гэр бүлийн залуу гишүүн тэрээр өнгөрсөн есдүгээр сараас эхлэн энд нисдэг тэрэгний нисгэгчээр ажилласан юм. Түүнийг энд алба хааж байх үед талибууд амь насыг нь хөнөөнө хэмээн заналхийлж, 2012 оны намар сөрөг хүчний зэвсэгт бүлэглэлийнхэн баруун Гильменд муж дахь “Кэмп Бэстион” бааз руу дайрах үеэр ханхүү тэнд байсан ч суманд өртөөгүй юм. Түүгээр ч барахгүй ханхүү “Талибан” хөдөлгөөний хээрийн нэг командлагчийг өөрийн биеэр устгасан байна. Ханхүү Харри өмнө нь 2007- 2008 оны заагаар энд их бууны буудагчаар алба хааж байсан юм.
Энэ удаа Харри Афганд байхдаа нэг биш удаа байлдааны нислэг хийж талибуудын газар дээрх объектуудыг устгах ажиллагаанд оролцсон байна. Нэг удаагийн ийм ажиллагааны үеэр ханхүү шархадсан цэргийг аврах гэсэн нэг нисдэг тэргийг агаараас халхлах ноцтой ажиллагаанд гар бие оролцжээ.