2014 онд манай хойд хөрш ОХУ-ын Сочи хотноо болох өвлийн олимпын тасалбарын үнэ тодорхой боллоо. Хамгийн тансаг буюу хоккейн багуудын алт медалийн  төлөөх тоглолтыг үзэх хөгжөөн дэмжигч 40 мянган рублиэр тасалбар худалдан авах юм байна. Хамгийн хямд нь эмэгтэйчүүдийн чарганы төгсгөлийн тэмцээнийг нэг мянган рублиэр үзэж болно гэнэ. Эрэгтэйчүүдийн хоккейн хүрэл медалийн төлөөх тэмцээнийг 4-23 мянган рублиэр үзэж болох бол ерийн явцын тэмцээнийг 1,2-7 мянган рублиэр, дөрөвний нэг  шигшээ тэмцээнийг 3-17 мянга, хагас шигшээг 4-23 мянган рублиэр үзэх юм.
Эмэгтэйчүүдийн хоккейн алтан медалийн төлөөх тоглолт харьцангуй хямд 2-11 мянган рубль бол хүрэл медалийн төлөөх тоглолтын тасалбар 1,5-7 мянган рубль юм байна.
Сочид мөнгөө хэмнэж хямд үнээр үзэж болох тэмцээн нь чарга, цанын спортын тэмцээн байх нь. Эрэгтэй эмэгтэйчүүдийн ганцаарчилсан гулгалтын тэмцээний хамгийн тохиромжтой суудлын үнэ 20 мянган рубль байх юм. Олимпын хүрээлэнд орох тасалбар харин 200 рубль.
Олимпын тасалбарыг www.tickets.sochi2014.com сайтаар дамжуулан худалдаалах юм байна. Харин тасалбар дамлан худалдвал нэг сая рублийн торгууль хүлээж байгаа юм.