Филиппиний Замбоанга хотод эзнийхээ хоёр ачийг ослоос аварсан Кабанг гэдэг ухаант нохой АНУ-ын мал эмнэлгийн нэгэн клиникт мэс засал хийлгэхээр  ниссэн байна. Өчигдөр түүнийг нисэх буудлаас үдэхээр олон хүн машинтайгаа ирсэн нь бүхэл бүтэн цуваа болжээ.   2011 оны арванхоёрдугаар сард Замбоанг хотноо гурван настай Принсес Диансинг, 11 настай Дину Бунгал хоёр тоглож байхад булангийн цаанаас мотоциклтой хүн маш хурдтай  гарч ирсэн байна. Харин Кабанг нохой мотоциклийг зогсоохоор урдуур нь дайрчээ. Үүнийг харсан хүн “хэн нэгэн нь мотоциклын доогуур нохойг шидчих шиг л болсон. Хэн ингэснийг нь хараагүй” гэснийг орон нутгийн сонинд бичсэн байна.  Охид ердөө л энд тэндээ жаахан шалбарсныг эс тооцвол эв эрүүл гарч, харин Кабанг   хамаргүй болж, бас хоншоорынх нь дээд хэсэг бяцарчээ. Филиппиний эмч нар дөрвөн хөлт баатрыг аврах гэж өнгөрсөн 10 сарын турш элдэв эм өгч байж элэг бөөрний нь бэртлийг эмчилсэн байна. Харин хамар хоншоорыг нь АНУ-д эмчлүүлэх шаардлагатай болсон тул амьтан хамгаалагчид Америк явахад шаардлагатай мөнгө цуглуулжээ. Калифорнийн Их сургуулийн дэргэдэх мал эмнэлгийн сургуулийн мэргэжилтнүүд Кабангад хиймэл хамар, хоншоор хийж өгөх болсон байна.