Тунисын хүүхдийн “Солонго” сэтгүүлд “Молотовын коктейль” гэдэг шатаагч шингэн бүхий шил бэлтгэх заавар гаргасныг эсэргүүцэн Эмэгтэйчүүд, гэр бүлийн яам шүүхэд хандсан байна. Хүүхдүүд ийм аюултай зүйл хийж бусдын төдийгүй өөрийнхөө амь нас эрүүл мэндэд  хөнөөл учруулж магадгүй, тэгээд ч алан хядах, террорист ажиллагаанд ашиглахыг үгүйсгэхгүй гэж тус яам үзжээ.
“Молотовын коктель” гэдэг шатаагч шингэн бүхий шил нь дэлхий даяар алан хядах, эсэргүүцлийн жагсаалын үеэр ашигладаг хамгийн түгээмэл хэрэгсэл. Сэтгүүл ийм зүйл хийх аргыг “Мэдлэгийн булан” хэсэгтээ нийтэлсэн байна.
“Молотовын коктейль” гэдэг бол лонхонд бензин, спирт, тос зэрэг шатаагч шингэн хийж бэлтгэдэг, 1939-40 онд Зөвлөлт-Финийн дайны үед хэрэглэж байсан нэг төрлийн зэвсэг. Оросуудын хэрэглэдэг байсан шатаагч энэ зүйлд финляндчууд ийм нэр өгсөн юм байна.
Сэтгүүл энэ бүхнийг нарийвчлан бичээд “асаагаад эсрэг тал руугаа шидэхэд галдан шатаана” гээд зургийг нь тавьжээ.
Сүүлийн үест Тунист эмх замбараагүй байдал үргэлжилж хамгийн сүүлд АНУ-ын “Гэм зэмгүй мусульманчууд” киног эсэргүүцсэн олон нийтийн жагсаал Америкийн дипломат төлөөлөгчийн газрын дэргэд болж байсан юм.