Умард Солонгосын цэргийнхэн өөрсдийн пуужингаа Америк тивд хүрч чадна гэж анхаарууллаа. Энэ талаар БНАСАУ-ын Үндэсний батлан хамгаалах яамны төлөөлөгч өнөөдөр мэдээлснийг Солонгосын мэдээллийн агентлаг дамжуулсан байна.
Нэрээ хэлэхийг хүсээгүй умардын түшмэлийн хэлснээр бол умардынхан цөмийн цэнэгтэй ямар ч пуужингийн цохилтод хариу өгч чадна гэнэ. Үүнээс гадна Япон болон Гуамын арлуудад цохилт өгч чадах юм байна.
Өнөөдөр Умард Солонгосын зэвсэглэлд өмнө байсан “Родон-2”, “Тепходон-2”, “Мусудан”  пуужингийн үндсэн дээр зохион бүтээсэн Р-11 пуужин байгаа юм. Гэхдээ Өмнөд Солонгосын Дипломатын академийн профессор Юн Дук Мин “Умардынхан тийм ч хурдан тив алгасах пуужинтай болчихгүй ээ. Ийм пуужин бүтээсэн тухай ямар ч нотолгоо байхгүй” гэж мэдэгдсэн байна. Тэрээр БНАСАУ-ын мэдээллийн агентлагийн энэ мэдээ нь цэргийнхнийхээ сэтгэл санааг дээшлүүлэх гэсэн нэг арга гэжээ.