Манай гариг дээрх хамгийн өндөр настай эмэгтэй болох Гүржийн Антиса Хвичава 132 насандаа таалал төгссөн байна. Оросын хувьсгал, дэлхийн хоёр дайн, ЗХУ байгуулагдах болон тарахыг үзсэн энэ эмэгтэй Цаленжихскийн районд 132 насныхаа төрсөн өдрийг тэмдэглэснээс хойш гурван сар болоод нас нөгчжээ. Албан ёсоор түүнийг 1880 оны долдугаар сарын 8-нд төрсөн гэж бүртгэсэн байдаг юм байна. Гүржийнхэн урт насалдаг ч Антиса эмээ нас нөгчитлөө ухаан саруул байж, 1965 он хүртэл буюу 85 насалтлаа хөдөө аж ахуйд ажиллаж байжээ. Хамгийн өндөр насалсан энэ эмэгтэй бас хамгийн өнөдр настайдаа хүүхэд төрүүлсэн эмэгтэй болж байгаа юм. Түүний хоёр хүүхэд нь Эх орны дайнд амь үрэгдсэн болохоор тэрээр 60 настайдаа хүү төрүүлсэн нь одоо 73 настай гэнэ. Энэ эмээд 10 ач, 12 гуч, зургаан жич үлдсэн байна. Хэдийгээр түүний яг төрсөн тухай баримт бичиг үлдээгүй ч зөвлөлтийн болон, хувьсгалаас өмнөх баримт бичгүүдээр түүний төрсөн он, өдрийг тогтоосон юм байна.