Монгол Оросын хил орчим 15 мянган жилийн өмнө унасан солирын төмрөөр цутгаж хийсэн гэх бурхан эрдэмтдийн гайхшралыг төрүүлж байна. Хөшөөг олсон түүх нь бүр ч сонирхолтой гэж болохоор. “Төмөр хүн” гэж нэрлэгдсэн энэ баримал 24 сантиметр өндөр, 10 кг жинтэй. Үүнийг хамгийн анх 1938 онд Түвдэд судалгааны ажил хийж байсан Нацист Германы “Ананэрбэ” нэртэй маш нууц байгууллагын эрдэмтэд олсон байна. Тухайн үед “СС”-ийн эрдэмтэд нь ари үндэстний түүхийг судлахаар Түвдөд очоод байсан аж.
Нацист Герман дайнд ялагдсаны дараа энэ бурхны баримал хувийн цуглуулагчийн гарт очсон байгаад сая ийнхүү эрдэмтэд судлах боломжтой болжээ. Эрдэмтэд 15 мянган жилийн өмнө унасан байгаад  өнгөрсөн зууны эхээр олдсон Чингэ нэртэй солирын хэлтэрхийгээр цутгасан болохыг тогтоож. Буддын шашны “Вайшравана” нэртэй бурхныг дүрсэлсэн энэ баримлыг зарим судлаач Чингис хааныг хөшөө байж болзошгүй гэсэн таамаг дэвшүүлээд байгаа юм.