Зэвсэглэлдээ жилд хамгийн их хөрөнгө зардаг улсуудын нэг нь Энэтхэг байсхийгээд л хөрш Пакистантайгаа Жаму, Кашмир мужуудын маргаантай бүс нутгаас болж дайтаж байдаг. Мөн БНХАУ-тай газар нутгийн маргаанаас болж хоёр ч удаа дайсан улс. Энэ хоёр гол өрсөлдөгч нь цөмийн зэвсэгтэй, зэвсэглэлээр тун ч их хөөцөлддөг болохоор ингэж хөрөнгө үрэх нь арга ч үгүй юм уу гэмээр. Энэ удаад Энэтхэгийн тал Оросоос 40 ширхэг Су-30МКИ сөнөөгч онгоц худалдаж авахаар болжээ. Ирэх сард Ерөнхийлөгч В.В.Путиныг Энэтхэгт айлчлах үеэр энэ гэрээнд гарын үсэг зурах юм. Гэрээний өртөг нь 3,77 тэрбум ам.доллар.  Одоогийн байдлаар Энэтхэгийн Цэргийн нисэх хүчинд тус бүр 20 ширхэг Су-30МКИ онгоц бүхий таван эскадрил байгаа юм. Энэтхэгчүүдийн худалдан авах гэж байгаа онгоц нь тав дахь үеийн сөнөөгч онгоцонд тавигддаг хамгийн сүүлийн үеийн шаардлагуудад бүрэн нийцсэн онгоц.
Энэтхэг нь энэ оны нэгдүгээр сард 126 ширхэг сөнөөгч онгоц худалдан авах тендер зарлаж түүнд нь Францын тал ялж “Rafale” онгоц нийлүүлэхээр болсон. Энэ онгоцууд бүр Зөвлөлтийн үед үйлдвэрлэсэн хуучирсан МиГ -21 онгоцыг солих зориулалттай юм. Францын сөнөөгчийг худалдан авахад энэтхэгчүүд 10 тэрбум гаруй ам.доллар зарцуулна.