Нигерийн зүүн хойд нутгийн Муби хотын политехникийн коллежид өчигдөр өглөөгүүр зэвсэгт этгээд дайран орж гал нээснээр 27 оюутан амь алдаж 15 хүн шархаджээ. Гэмт этгээд сургуулийн хашаа, хичээлийн танхимд орж ямар ч гэмгүй оюутнууд руу хэдэн цагийн турш гал нээж байхад цагдаа, армийнхан аль нь ч хориглох ямар нэг арга хэмжээ аваагүй байна. Тэр бүү хэл ийм халдлага болох гэж байгааг сургуулийн удирдлагууд мэдсэн ч урьдчилан сэргийлэх ямар нэг арга хэмжээ аваагүй гэсэн мэдээлэл байна. Мягмар гарагт оюутнуудаа нүүлгэн шилжүүл, хичээлд нь битгий ирүүл гэсэн бичиг сургуулийн хашаанаас өмнө нь олдсон юм байна.
Гэмт халдлагын бурууг одоогоор Нигерийн нутагт ажилладаг ямар ч зэвсэгт бүлэглэл хүлээгээгүй байна. Харин цагдаагийнхан исламын “Боко храм” бүлэглэлийг хэмээн сэжиглэж байгаа юм байна. Энэ бүлэглэл улс орондоо исламын гүрэн байгуулах, боловсролын орчин үеийн хэв загварыг өөрчлөхийг зорилгоо болгодог гэнэ. “Боко храм”-ын исламчууд өнгөрсөн онд 1400 хүний аминд хүрсэн бол энэ жил бараг 700 хүний амь хөнөөсөн гэмт хэргийг өөр дээрээ хүлээгээд байгаа юм.
