Оросын нутаг өмнөд Уралаас эрдэмтэд эртний аварга том зураг олжээ. Газар дээр чулуугаар дүрсэлсэн энэ хандгайн эврээсээ туруу хүртлээ 275 метр гээд бодохоор ямар аварга болох нь андашгүй. Эрдэмтэд энэ зургийн насыг лавтай найман мянган жил гэж үзэж байна.
Гэтэл Перуд байдаг Наскагийн гайхамшит дүрслэлийг эрдэмтэд МЭӨ II зууны үеийнх гээд бодохоор манай дэлхий дээр хүний гараар бүтсэн хамгийн агуу зүйл Орост байж магадгүй мэт. Оросын ШУА-ийн Уралын салбар энд малтлаг хийж энэ зүйлийг хэдийд, ямар багажаар яаж, яах гэж бүтээсэн болох талаарх хариу олохоор ажиллаж байгаа юм байна. Гэхдээ зураасын өргөн нь л гэхэд 10 метр энэ том байгууламжийн ард нуугдаж байгаа олон олон нууцыг олж нээхэд хэдэн арван жил хэрэгтэй бололтой.